तीजको मूल सम्बन्ध आत्मानुशासनसँग गहिरो रूपमा जोडिएको छ: प्रधानमन्त्री ओली

काठमाडौं । प्रधानमन्त्री केपी शर्मा ओलीले हरितालिका तीज पर्व आत्मिक शुद्धता र दाम्पत्य जीवन सुदृढीकरणको उत्सव भएको बताएका छन् ।

तीजपर्वको शुभकामना दिँदै प्रधानमन्त्री ओलीले सामाजिक संजाल फेसबुकमा पेजमा लेखेका छन्–‘तीजलाई प्रायः गीत–नृत्यको पर्वका रूपमा मात्रै बुझ्ने गरिएको छ । तर यसको मूल सम्बन्ध ब्रत, संयम र आत्म–अनुशासनसँग गहिरो रूपमा जोडिएको छ । प्राचीनकालमा पतिपत्नी दुवैले सप्तऋषिको पूजा गर्दै ब्रत बस्ने चलन रहेको पाइन्छ । समयक्रममा महिलामात्रै ब्रत बस्ने परम्परा विकसित भयो । अहिलेको समाजमा अझै नयाँ मतहरू पनि आएका छन् ।’

‘हाम्रो संस्कृतिले तीजलाई आत्मिक शुद्धता र दाम्पत्य जीवन सुदृढीकरणको ब्रतोत्सवका रूपमा लिएको छ । संयुक्त परिवार संस्कृतिको सुगन्ध बोकेको हरितालिका तीजले सबैको परिवारमा आत्मीयता, दाम्पत्यमा उल्लास र समाजमा सौहार्द फैलाओस् ।’

ओलीले तीजलाई नाचगानको पर्वको रुपमा मात्र बुझ्न नहुने बताएका छन् । तीजको मूल सम्बन्ध ब्रत, संयम र आत्म अनुशासनसँग गहिरो रूपमा जोडिएको उनले बताए ।