विद्या भण्डारीको निवासमा तीज कार्यक्रम, नवीना लामादेखि भानुभक्त ढकाल पत्नीसम्म सहभागी

काठमाडांै । प्रधानमन्त्री केपी शर्मा ओलीले असन्तुष्ट र एकाध जनसंगठनमा हारेकाहरुलाई जम्मा गरेर पार्टी एकतामा असहयोग गरेको आरोप लगाएकै दिन शुक्रबार पूर्वराष्ट्रपति बिद्यादेवी भण्डारीले आफ्नो निवास भंगालमा तीज कार्यक्रम राखेकी छन् । जुन कार्यक्रममा महिला नेतृहरु भेला भएका थिए ।

एमाले नेतृत्वको बक्रदृष्टिमा पर्ने डरसमेत नमानी भंगालमा तीज मान्न महिला नेतृहरु पुगेका थिए । भण्डारीको निवासमा आयोजित तीज कार्यक्रममा एमालेका महिला नेतृहरुको सहभागिता थियो । भंगालमा तीजमा नाच्न एमालेका करिब एक दर्जन महिला केन्दीय सदस्यहरु पुगेका थिए । पाटीका केन्द्रीय सदस्य सरीता भट्टराई, नवीना लामा, एमाले नेतृ शान्ति अधिकारीदेखि पूर्वसांसद सीता पौडेल, गोमा देवकोटा र तीर्था गौतम सहभागी थिए । शान्ति अधिकारी पूर्वप्रधानमन्त्री स्व. मनमोहन अधिकारीकी बुहारी हुन् ।

पोखरा महानगरपालिकाकी उपमेयर मन्जु गुरुङ, महिला आयोगकी अध्यक्ष कमला पराजुली, बुढानीलकन्ठ नगरपालिकाकी उपमेयर अनिता लामा, बुढानीलकन्ठकै पूर्व उपमेयर रमा राई र एमाले केन्द्रीय सदस्य गैरसरकारी संस्था महासंघकी पूर्वअध्यक्ष शर्मिला कार्की, भगवती थापालगायतका महिला नेतृहरु भण्डारीको निवास भंगाल पुगेका थिए ।

पार्टीभित्र विद्या भण्डारीको चर्को आलोचना गर्ने एमाले नेता भानुभक्त ढकालकी पत्नी इन्दिरा फुयाँल पनि भंगालमा तीज मनाउन पुगेकी थिइन् ।  अनेरास्ववियुकी पूर्व सचिव आरती भट्टराई लगायतका विद्यार्थी नेतृहरु पनि  तीज कार्यक्रममा सहभागी हुन भंगाल पुगेका थिए ।