भारतका विदेश सचिवको उपरखुट्टी आसनप्रति बस्नेतको टिप्पणी : सम्मानजनक व्यवहार मानिँदैन

काठमाडौं । प्रधानमन्त्री केपी शर्मा ओलीसँग भेटवार्ताका क्रममा भारतीय बिदेश सचिव बिक्रम मिस्रीको उपरखुट्टी आसनप्रति बिभिन्न टिकाटिप्पणी भइरहेका छन् ।

यसैक्रममा नेकपा (एमाले)का पोलिट्ब्यूरो सदस्य महेश बस्नेतले सचिव मिस्रीले प्रधानमन्त्रीसँग भेटका क्रममा अपनाएको आसनप्रति आपत्ति जनाएका छन् ।

सामाजिक सञ्जालमा भाइरल बनेको तस्बीरमा मिस्रीले खुट्टा चडाएर बसेको देखिएपछि बस्नेतले यसलाई नेपाल–भारत सम्बन्ध र कूटनीतिक मर्यादासँग मेल नखाने व्यवहार भनेका हुन् ।

उनले भने–‘हाम्रो संस्कृति र कूटनीतिक शिष्टाचारमा प्रधानमन्त्री वा राष्ट्रप्रमुखसँग भेट्दा संयमित आसन, सम्मानयुक्त भंगिमा र मर्यादित व्यवहार अपेक्षित हुन्छ । व्यक्तिगत सहजता जस्तो देखिए पनि यस्तो दृश्यले राष्ट्र र पदको गरिमा कमजोर बनाउँछ ।’

बस्नेतले कूटनीतिक सम्बन्धमा आचरण र शिष्टताको भूमिका महत्वपूर्ण हुने भन्दै मित्रताको गहिराइ देखाउने मुख्य आधार नै आपसी सम्मान भएको स्मरण गराए । अहिले सामाजिक सञ्जालमा उक्त तस्वीर भाइरल भइरहेको छ । उत्कृष्ट हेडलाइनहरु बनाउनुहोस् ।