निलम्बनविरुद्ध उच्च अदालत पुगे राजुनाथ पाण्डे

काठमाडौं । काठमाडौं महानगरपालिकाका नगर प्रहरी प्रमुख राजुनाथ पाण्डेले आफूलाई निलम्बन गर्ने प्रमुख प्रशासकीय अधिकृत सरोज गुरागाईंको निर्णयविरुद्ध उच्च अदालतमा रिट दायर गरेका छन् । पाण्डेको रिटमाथि बुधवार सुनुवाइ हुने अदालतले जनाएको छ ।

गत चैत २१ गते गुरागाईं कार्यालयमा हाजिर हुन जाँदा पाण्डेको नेतृत्वमा रहेको नगर प्रहरी टोलीले अवरोध गरेको आरोपमा उनलाई निलम्बन गरिएको थियो । महानगरले उक्त घटनाको छानबिन गर्न प्रशासन प्रमुख ध्रुव काफ्लेको नेतृत्वमा जाँचबुझ समिति गठन गरेको छ, जुन अहिले पनि सक्रिय छ ।

यसअघि गुरागाईंले पाण्डेसँग स्पष्टीकरण मागेका थिए । पाण्डेको स्पष्टीकरण चित्तबुझ्दो नभएपछि निलम्बन गरी थप अनुसन्धान अघि बढाइएको गुरागाईंले बताएका छन् । चैत २१ गते उपप्रमुख, वडाध्यक्षहरू र कार्यपालिका सदस्यहरूले पटक–पटक अनुरोध गर्दा पनि गुरागाईंको कार्यकक्षको ताला खोल्न पाण्डेले अवरोध गरेको भन्दै सात बुँदे पत्रमार्फत उनलाई प्रश्न सोधिएको थियो।

काठमाडौं भ्यू टावरको नक्सा पास विवादपछि बिदामा बसेका गुरागाईं कार्यालय फर्किँदा उपप्रमुख सुनीता डंगोलको नेतृत्वमा हाजिर हुन गएका थिए । तर, नगर प्रहरीले कार्यालय प्रवेशमा अवरोध गरेको आरोप छ । महानगरले पाण्डेमाथि कर्मचारी आचरण र अनुशासन उल्लङ्घन गरेको र प्रमुख प्रशासकीय अधिकृतको निर्देशन पालना नगरेको आरोप लगाएको छ ।