संसदमा रास्वपाको बिरोध, पर्सामा रवि लामिछानेबिरुद्ध मुद्दा दर्ता

काठमाडौं । भिजिट भिसा प्रकरणमा गृहमन्त्री रमेश लेखकको राजीनामा र उच्चस्तरीय छानबिनको माग गर्दै राष्ट्रिय स्वतन्त्र पार्टी (रास्वपा)ले धर्ना दिइरहेकै बेला सरकारमातहतको निकायले भने आजै रवि लामिछानेबिरुद्ध पर्सा जिल्ला अदालतमा सहकारी ठगीको मुद्दा दर्ता गरेको छ ।

सरकारी वकिल कार्यालय पर्साले रास्वपा सभापति रवि लामिछानेसहित २९ जनाविरूद्व पर्सामा मुद्दा दायर गरेको छ । सानो पाइला सहकारी ठगी आरोपमा आज लामिछानेसहित २९ जनाविरूद्ध पर्सा जिल्ला अदालतमा मुद्दा दायर भएको हो ।

लामिछानेसँगै पूर्व डीआइजी छविलाल जोशीलाई पनि प्रतिवादी बनाइएको छ । सरकारी वकिलले छविलाल जोशीसँग ७ करोड २० लाख ९८ हजार रुपैयाँ र रवि लामिछानेसँग ११ करोड ५६ लाख ९४ हजार बिगो मागदाबी गरेको छ ।

प्रहरीले अनुसन्धान सकेर करिब एक महिनाअघि सरकारी वकिल कार्यालय पर्सालाई प्रतिवेदन बुझाएकोमा सरकारी वकिल कार्यालयले शुक्रबारमात्र अदालतमा मुद्दा दायर गरेको अदालतका सूचना अधिकारी रामनरेश महतोले जानकारी दिएका छन् ।

रास्वपाले संसदमा भिजिट भिसा प्रकरणमा गृहमन्त्री लेखकको राजीनामा माग्नु र पर्सा जिल्ला अदालतमा रविबिरुद्ध मुद्दा दायर हुनु संयोग मात्र त होइन कि भन्ने आशंका गरिएको छ ।