अनेरास्ववियुको नेतृत्व जबर्जस्ती घोषणा गर्न खोजेपछि निर्वाचनको माग गर्दै कीर्तिपुरमा चर्को नाराबाजी

काठमाडौं । अनेरास्ववियुका अध्यक्षलगायत पदाधिकारी एमालेले बालुवाटारबाट जबर्जस्ती घोषणा गर्न खोजेपछि विद्यार्थीहरुले कीर्तिपुरस्थित त्रिभुवन विश्वविद्यालयको हलमा चर्को नाराबाजी गरेका छन् ।

आइतबारबाट सुरु भएको अनेरास्ववियुको २४ औं महाधिवेशनको उदघाटन प्रधानमन्त्री तथा एमाले अध्यक्ष केपी शर्मा ओलीले गरेका थिए । युवासंघमा पनि जबर्जंस्ती नेतृत्व घोषणा गर्न प्रतिनिधिहरुले नाराबाजी गरेपछि निर्वाचन गर्न एमाले नेतृत्व बाध्य भएको थियो । अखिलमा पनि निर्वाचन नगरी नेतृत्व घोषणा गर्न खोज्दा बिरोध भएकाले निर्वाचन गर्नैपर्ने दबाबमा पार्टी नेतृत्व पुगेको छ ।

बालुवाटारले जबर्जस्ती घोषणा गर्न लागेपछि निर्वाचनको माग गर्दै विद्यार्थी नेताहरुले बिरोध गरिरहेका छन् ।

अनेरास्ववियुको अध्यक्षमा डा. सुजन कडरिया र पदाधिकारीमा समेत सर्वसम्मत घोषणा गर्न निर्वाचन मण्डलले तयारी गरेको थियो । तर विद्यार्थी नेताहरुले बिरोध गरेपछि मंगलबार दिउँसो निर्वाचन तालिका नै निकालेर चुनावमा जान एमाले नेतृत्व बाध्य भएको छ । निर्वाचन बुधबार १० बजेदेखि त्रिविवि हल कीर्तिपुरमा हुनेछ ।

अध्यक्षमा प्रकाश पौडेल, महासचिवमा दीपक धामी, आरती भट्टराई लगायतले दाबी गरेका छन् ।