राजावादी आन्दोलन आजबाट पुनः सुरु, सिफलचौरबाट प्रदर्शन

काठमाडौं । राजा र हिन्दू राष्ट्रको मागसहित जारी आन्दोलन आज सिफलचौरबाट आरम्भ हुने भएको छ ।

संयुक्त जनआन्दोलन समितिका अनुसार जेठ १५ देखि सुरु भएको आन्दोलन जेठ २० गते, मंगलबार सिफल चौरमा दिनको २ बजेबाट प्रारम्भ हुने भएको छ ।

सोमबार तत्कालीन राजा वीरेन्द्रको बंशनाश भएको स्मृतिमा शोक मनाउन आन्दोलन स्थगित गरिएको थियो ।

जेठ १८ गते नक्साल नारायणचौरबाट बालुवाटारतर्फ जाने क्रममा निषेधित क्षेत्र तोडेको आरोपमा राप्रपा नेपालका अध्यक्ष कमल थापालाई पक्राउ गरिएको थियो ।
प्रहरीले पूर्वगृहमन्त्रीसमेत रहेका थापालाई नियन्त्रणमा लिने क्रममा बुट प्रहार गरेको र अमर्यादित ब्यवहार गरेको गुनासो थापाले गरेका थिए ।