बाणिज्य बिभागमा कर्मचारीको हेरफेर, मन्त्रीको सचिवालयको दबाबमा विवादितलाई महत्त्वपूर्ण जिम्मा

काठमाडौं । बाणिज्य, आपूर्ति तथा उपभोक्ता संरक्षण बिभागभित्र कर्मचारीहरुको ब्यापक फेरबदल गरिएको छ । बिभागका महानिर्देशक कुमार दाहालले आइतबार कर्मचारीहरुको आन्तरिक सरुवा गरेका हुन् । महानिर्देशक दाहालले बिभागमा काम गर्नसक्ने काबिल र क्षमतावानलाई ल्याउन खोजे पनि उद्योग मन्त्रालयको हस्तक्षेपका कारण नसकेको बताइन्छ ।

विगत केही बर्षदेखि ठप्प रहेको बजार अनुगमनलाई तीव्रता दिएका महानिर्देशक दाहाललाई सघाउ पुर्याउनेभन्दा पनि बर्षौदेखि कार्यरत र लाभतिर केन्द्रित हुनेहरु महत्वपूर्ण शाखामा लगिएको छ ।

बाणिज्य बिभागको महत्वपूर्ण मानिने अनुगमन शाखाको निर्देशकमा विवादास्पद उपसचिव जगदिश अर्याललाई ल्याइएको छ । अर्याल फर्म शाखाबाट त्यहाँ पुगेका हुन् । कमजोर नेतृत्व क्षमता भएका अर्याल आर्थिक मामिलामा पनि उत्तिकै कमजोर मानिन्छन् । अर्याललाई अनुगमन शाखाको नेतृत्वमा ल्याउनका लागि उद्योग मन्त्री दामोदर भण्डारीका स्वकीय सचिव आनन्द भट्टले विशेष जोडबल नै गरेका थिए ।

भट्टकै कृपामा करोडपति शाखा अधिकृतका रुपमा परिचित विश्वराज दाहाललाई उद्योग मन्त्रालयबाट सरुवा गरेर बाणिज्य बिभागको अनुगमन शाखामा पुर्याइएको छ । दाहाल निर्वाचन आयोगको स्टोर शाखा सम्हालेर अकूत सम्पत्ति आर्जन गरी त्यहाँबाट उद्योग मन्त्रालयमा पुगेका थिए । उद्योगमा पनि स्टोर शाखा नै सम्हालेका थिए । भट्टको निगाहामा दाहाल अनुगमनमा पुगेका हुन् ।

त्यसैगरी, ५ बर्षदेखि बिभागमै एकछत्र राज गरेका शाखा अधिकृत लोकराज सुवेदी आयात निर्यात शाखाबाट अनुगमन शाखामा पुगेका छन् । सुवेदीले बाणिज्यमा आधा दशक रजगज गरेको रेकर्डबारे सामान्य प्रशासन मन्त्रालय र उद्योग मन्त्रालयले समेत भेउ पाउन सकेका छैनन् । आयात निर्यात शाखामा रहँदा दैनिक लाखौं घुस बुझ्दैआएका सुवेदीलाई ब्यापारी तह लाउने ठाउँमा लगेर पुरस्कृत गरिएको छ ।

त्यस्तै, फर्म शाखाबाट शाखा अधिकृतद्वय मंगल बिष्ट र रामचन्द्र ढकाललाई अनुगमनमा लगिएको छ । आयात निर्र्यातमा ५ बर्षदेखि नै कार्यरत नायबसुब्बा गोविन्द पराजुली पनि करोडपति शाखा अधिकृत बिश्वराज दाहाललाई सघाउन अनुगमनमा पुुगेका छन् । रातो गाडीका चालकका रुपमा चर्चित सवारीचालक हेमचन्द्र दाहाल जो अनुगमन शाखाको निर्देशकको भन्दा बढी हैकम जमाउँछन्, उनलाई भने सो शाखाबाट सरुवा गरिएको छैन ।

बिभागको भन्सारका रुपमा चिनिने आयात निर्यात शाखाको निर्देशकमा डिकबहादुर कार्कीलाई सरुवा गरिएको छ । शेखरबाबु कार्कीको अवकाशसँगै डिकबहादुरलाई अनुगमनबाट उक्त शाखाको नेतृत्वमा लगिएको छ । डिकबहादुरको सरुवा सामान्य प्रशासन

मन्त्रालयले केही महिनाअघि धनुषाको नगराइन नगरपालिकाको प्रमुख प्रशासकीय अधिकृतमा गरेको भए पनि उनी रमाना नलिई बसिरहेका छन् । दरबन्दी नगराइनमै रहेका र सरुवा थमौती समेत नभएका कार्कीलाई महानिर्देशक दाहालले अझ महत्वपूर्ण शाखाको नेतृत्व दिएका छन् ।

त्यस्तै आयात निर्यातमै अनुगमनबाट शाखा अधिकृत गायत्रा श्रेष्ठ र प्रशासनबाट शाखा अधिकृत भोजराज श्रीपालीलाई आयात निर्यात शाखामा लगिएको छ । आयात निर्यातका शाखा अधिकृत प्रतिका रेग्मीलाई फर्म शाखामा, नयाँ दर्ताबाट

शाखा अधिकृत गंगा तिमल्सिनालाई नवीकरणमा, नासु तारानाथ निरौलालाई अनुगमनबाट फर्म शाखामा खटाइएको छ ।

प्रशासन शाखाका विवादास्पद उपसचिव भरत आचार्यले फर्म शाखाको समेत नेतृत्व गर्र्ने जिम्मेवारी पाएका छन् । प्रशासनमा रहँदा आयात निर्यात, अनुगमन, फर्म शाखाका कर्मचारीसँग घुस मागेर हैरान बनाउने र नदिने कर्मचारीलाई पँजनी गर्ने कार्यमा अग्रसर रहँदैआएका आचार्य महानिर्देशक दाहालसँग पनि घनिष्ट सम्बन्ध देखाउने गर्दछन् ।

विगत लामो समयदेखि अनुगमनमा रजगज गर्दैआएका शाखा अधिकृत नितु भट्टराई, उमा श्रेष्ठ र नासु सीता मिश्रको शाखा भने परिवर्तन गरिएको छैन । शाखा अधिकृत भट्टराई हाजिर गरी आफ्नै निजी काममा ब्यस्त हुँदा पनि प्रशासन शाखाका उपसचिव आचार्यले उनलाई छुट दिएका छन् ।