सशस्त्र प्रहरीद्वारा सर्वसाधारणमाथि कुटपिट, डीएसपीसहित ३ जनाबिरुद्धको जाहेरी प्रहरीले लिएन

 

जनकपुरधाम । धनुषाको महिनाथपुर बोर्डरमा अनाहकमा सर्वसाधारणलाई कुटपिट गरेको आरोपमा महिनाथपुर गुल्मका इन्चार्ज डिएसपी सुरज रिजालसहित तीन सशस्त्र प्रहरीमाथि जाहेरी दर्ता गर्न जाँदा जिल्ला प्रहरी कार्यालय धनुषाले नलिएपछि पीडितले अदालत गुहारेका छन् ।

धनुषाको विदेह नगरपालिका वडा नम्बर २ बस्ने स्थानीय अमन चौधरी आफ्नो खेतमा बाख्राको लागि पातपतिंगर टिपिरहँदा उनलाई सशस्त्र प्रहरीका दुई जवानले सम्प्रदायिक व्यवहार गर्दै कुटपिट गरेको बताएका छन् । सशस्त्र प्रहरीका डिएसपी रिजालको इशारामा त्यहाँ कार्यरत रहेका सशस्त्र प्रहरीका माधव अधिकारीसहित अन्यले भेदभाव तथा अन्य अपमानजनक कुरा गरी कुटपिट गरेको आरोप लगाएका छन् ।

नेपाल–भारत बोर्डरस्थित धनुषाको महिनाथपुर गुल्मका इन्चार्ज डिएसपी रिजालले कुटपिट गरेपछि अमन चौधरीले जिल्ला प्रहरी कार्यालय धनुषामा जाहेरी दिन गएका थिए । अस्पतालको घाउजाँच रिपोर्टसहित प्रहरीमा पुगेका चौधरीको जाहेरी दर्ता गराउन आदेश माग गर्दै अदालतमा पुगेका हुन् ।

चौधरीले जिल्ला अदालत धनुषामा कुटपिट गर्ने सशस्त्र प्रहरीका डीएसपी रिजालसहित तीनजनामाथि जाहेरी लिई अनुसन्धान गरी कारबाहीको लागि आदेश माग गर्न मुद्दा दिएका थिए । चौधरीको निवेदनमा सुनुवाइ गर्दै जिल्ला अदालत धनुषाले जाहेरी दर्ता गर्न र घाउजाँच फारामका लागि आदेश दियो । अदालतको आदेशपछि प्रहरीले घाउ जाँच फारामका लागि प्रादेशिक अस्पताल जनकपुरमा पठायो । तर जाहेरी भने मंगलबारसम्म लिएको छैन ।

सशस्त्र प्रहरीको कुटपिटबाट घाइते अमन चौधरी र प्रादेशिक अस्पतालको घाउजाँच फाराममा कुटपिट भएको देखिएको छ । चौधरीको खुट्टामा चोट लागेको छ । फागुन २५ गते बाख्रालाई घाँस लिन गएका उनलाई सशस्त्र प्रहरीले गाँजा तस्कर भन्दै खेतमा गएर निर्घात कुटपिट गरेको आरोप लगाएका छन् । उनले प्रादेशिक अस्पताल जनकपुरमा घाउ जाँच गराएर जिल्ला प्रहरी कार्यालय धनुषामा जाहेरी दर्ता गर्न जाँदा दर्ता नभएपछि जिल्ला अदालतमा मुद्दा दायर गरेका थिए । प्रहरीले घाउ जाँच केश फाराम गराए पनि जाहेरी नलिएर अदालतकै अवहेलना गरेको छ ।

समान्य समान लिएर जाने सर्वसाधारणसँग समेत महिनाथपुर गुल्मबाट खटिएको सशस्त्र प्रहरीले अभद्र व्यवहार गर्न थालेको आरोप चौधरीले लगाए । उनले अदालतमा दिएको मुद्दामा आफूलाई बचाउ खोज्दा केही महिलाहरुमाथि समेत सशस्त्र प्रहरीबाट अभद्र व्यवहार गरेको बताएका छन् ।

बोर्डर भन्दा १ कीमी दूरी नेपालतर्फको रेलवे लाइनमा सीसीटीभी फुटेज जडान गरिएको थियो । त्यो सीसीटीभी फुटालेको आरोप लगाउँदै निर्दोष नागरिक अमन चौधरीमाथि कुटपिट गरेका थिए । पीडित चौधरीले सशस्त्र प्रहरीको कुटाईबाट आफ्नो खुट्टाको नसामा असर परेको बताएका छन् ।

डीएसपी रिजालले घरायसी प्रयोजनमा सर्वसाधारणले ल्याएका सामान पनि बरामद गर्ने गरेका छन् । उनले बरामद सामान तुरुन्त भन्सारमा नबुझाई एकैपटक महिनामा बुझायने र यति मूल्य बराबरको सामान बरामद गरेको भनेर मिडियाबाजी गर्ने गरेको आरोप पनि छ ।

सशस्त्र प्रहरीमा बीओपी र भन्सार गुल्मका प्रमुख ६–६ महिनामा परिवर्तन हुने गर्दछ । तर रिजाललाई भने यो नीतिबिपरीत ९ महिना बीरगंजको भन्सार गुल्ममा राखिएको थियो । त्यसलगत्तै स?वा नीतिबिपरीत धनुषाको ठूलो तस्करीको नाका महिनाथपुर गुल्ममा काज गरिएको थियो । उनको अहिले दरबन्दी कायम भएको छ ।

डीएसपी रिजालको बालुवाटारमै पहुँच भएकाले सशस्त्रको नेतृत्वले उनलाई पटकपटक आकर्षक स्थानमा इन्चार्ज बनाउँदै आएको आरोप छ । डीएसपी रिजालले झोलेपोके र घरायसी सामान ल्याउनेलाई दुःख दिने तर ठूलो परिणाममा सामान ल्याउने तस्करह?सँग सेटिङ मिलाउने गरेको आरोप छ ।