टोखा नगरपालिकामा भ्रष्टाचार, अख्तियारको ध्यान कहिले जाला ?

शिवकुमार थापा

काठमाडौं । अख्तियार दुरुपयोग अनुसन्धान आयोगले दिनदिनै स्टीङ अप्रेसनमा घुसखोरी कर्मचारी र सम्बन्धित व्यक्तिहरुका विरुद्ध आक्रामक ढंगले कारबाही चलाएको छ । तर, पनि कतिपय पालिकाहरुमा खुलेआम घुस चलिरहेको छ । घुस रकम नदिँदा सर्वसाधारणले घर बनाउनका लागि पालिकाहरुमा नक्सापासको स्थायी इजाजत लिन झण्डै आधा बर्ष नै लगाएका छन् ।

टोखा नगरपालिकाको प्रशासनिक भवन निर्माण भएको दुई वर्ष नहुँदै कतै चर्कने त ढोका फुटिसकेको अवस्था छ । नगरपालिकाले १५ करोड २७ लाख ८१ हजार दुई सय १६ रुपैयाँमा गौरा श्रृंखला जेभीलाई निर्माणका लागि ठेक्का दिइएको थियो । तथापि ठेक्का दिइएको समयमा तयार हुन सकेन । पटक–पटक गरी तीन पटक म्याद थपिएको सूचना अधिकारी कमला कार्कीले जानाकारी दिइन् ।

नगर प्रमुखको कार्यकक्षबाट बाहिरपट्टिको प्याराफिट वालमा डिफेक्ट लियाबिलिटी पिरेड अगावै पूरै चर्किएको छ । सूचना अधिकारी कमला कार्कीले त्यहाँको ढोका अग्राखको भनी जानकारी दिए पनि फुटेर बिजोग अवस्थामा छ । एक कर्मचारीले बताए अनुसार उक्त ढोका गौरा श्रृंखला जेभीले चिलाउनेको काठ प्रयोग गरी बनाएको कारण त्यो अवस्थामा आएको बताए ।

नगरपालिकाको पूर्वाधार शाखा प्रमुखमा बझाङतिर जन्म भएकी पूजाकुमारी सिंह शाही छन् । उनले बझाङ घर भएका लक्ष्मी जोशीलाई ठेक्का दिलाएर राम्रो कमिसन हात पार्दै आएको बताइन्छ । अहिले जोशीले बूढानीलकण्ठ नगरपालिका वडा नम्बर ६ मा विशाल महल बनाएका छन् । उनी टोखा नगरपालिका ४ नम्बर वडाको एमाले पार्टीका सचिव पनि हुन् ।

इन्जिनियर पूजाकुमारी सिंह शाहीले टोखा ४ र ५ नम्बरको सबै काम उसैलाई दिन लगाउँछिन् । अहिले उनले पाएको ४ नम्बर वडाको जनकल्याण चोकदेखि कृष्ण मन्दिरसम्मको सडक बिस्तारको काम शुरू गरेर अलपत्र पारेका छन् । ४ नम्बर वडाको अध्यक्ष धर्म श्रेष्ठ एमालेबाट दोस्रो पटक निर्वाचित भएका हुन् । जोशीले पाएको ठेक्काको उनी पार्टनर नै हुन् । उनले यो रकम भागशान्तिमा नगरप्रमुख प्रकाश अधिकारीसम्म पु¥याएका एक कर्मचारीले आरोप लगाए । त्यसैले उनी जस्तो काम गरे पनि सुरक्षित र निर्धक्क छन् ।

यो अनियमिततामा हालसम्म अख्तियार दुरुपयोग अनुसन्धान आयोगको आँखा पुगेको छैन । दोस्रो पटक नगरप्रमुखमा निर्वाचित अधिकारीले ठूला महल बनाउँदा पाइने कमिसनको चास्नीमा नराम्ररी डुबेको स्थानीयको दाबी छ । नगरप्रमुखमा निर्वाचित भएपछि दुई पटक भन्दा बढी अवधि चुनाव लड्न नपाइने व्यवस्था छ । त्यसैले पनि अधिकारीलाई कमाउनमै ध्यान गएको स्रोत बताउँछ ।

सानादेखि ठूला ठूला ठेक्काहरु, कोटेशनका कामहरु पनि आफ्नै गाउँका लक्ष्मी जोशीलाई दिन दबाब र प्रभाव पार्नुहुन्छ भन्ने समाचार आएको छ नि भन्ने विषयमा प्रतिक्रियास्वरुप मोबाइलमा सम्पर्क गर्दा पूर्वाधार शाखा प्रमुख पूजा सिंहले भनिन्–‘लक्ष्मीलाई काम दिनू भनेर मैले कहीँ कतै पनि भनेकी छैन । मैले कसम नै खाएर भन्न सक्छु ।’