रास्वपाले कीर्तिपुरको मेयरमा उम्मेदवारी नदिने

काठमाडौं – राष्ट्रिय स्वतन्त्र पार्टी (रास्वपा)ले किर्तीपुरमा कुनैपनि पदमा उम्मेदवारी नदिने भएको छ । रास्वपाले किर्तीपुरमा मेयर र दुइटै वडाध्यक्षमा उम्मेदवारी नदिने भएको हो।

यही मंसिर १६ गते हुने स्थानीय तह उपनिर्वाचनका लागि रास्वपाले किर्तीपुरमा मेयर र वडाध्यक्षमा उम्मेदवारी दर्ता नगराउने रास्वपाका काठमाडौं सभापति प्रदीप विष्टले बताए ।

सभापति विष्टले आफ्नो पार्टीबाट उम्मेदवार नभएकाले स्वतन्त्र उम्मेदवारलाई समर्थन गर्ने पार्टीको तयारी रहेको बताए । यसबारे पार्टीले निर्णय लिने उनको भनाई छ ।

यसअघि रास्वपाबाट कीर्तिपुरको मेयरमा जयराम कार्कीको नाम सिफारिस भएको थियो। वडा नम्बर ४ मा सुशील बाँस्कोटाको नाम सिफारिस भएको थियो भने वडा नम्बर १ मा उम्मेदवार नै सिफारिस भएको थिएन।

मंसिर १६ गते हुने उपनिर्वाचनका लागि आइतबार उम्मेदवारी दर्ता चलिरहेको छ।