किन बोलाइयो आकस्मिक रुपमा मन्त्रिपरिषद बैठक ?

काठमाडौं । सोमबार र बिहीबार मात्र हुँदै आएको मन्त्रिपरिषद बैठक आज अकस्मात बोलाइएको छ । प्रधानमन्त्री केपी शर्मा ओलीले आज आकस्मिक रुपमा मन्त्रिपरिषद बैठक बोलाएपछि अनेक आशंका पैदा भएका छन् । बिहान १० बजे प्रधानमन्त्रीको सरकारी निवास बालुवाटारमा मन्त्रिपरिषद बैठक बोलाइएको छ । पार्टीभित्र विवाद कायम रहेको बेला आकस्मिक रुपमा मन्त्रिपरिषद बैठक बोलाउनुले पनि आशंका पैदा गर्ने ठाउँ दिएको छ ।

 मन्त्रिपरिषदको बैठकपछि संवैधानिक परिषदको बैठक ११ बजेका लागि राखिएको छ । आइतबार बोलाइएको संवैधानिक परिषद बैठक आजका लागि राखिएको थियो । नेकपाभित्रको विवाद थाँती रहेकी बेला संवैधानिक परिषद बैठक बोलाइएकोमा नेकपाका कार्यकारी अध्यक्ष पुष्पकमल दाहाल ‘प्रचण्ड’ले सोमबार एक कार्यक्रममा बिरोध गरेका छन् । आतइबारको बैठकमा विपक्षी दलका नेता शेरबहादुर देउवा नगएकाले स्थगित भएको थियो ।

आइतबारको बैठकमा सभामुख अग्निप्रसाद सापकोटा पनि नजाने संकेत पाएपछि स्थगित भएको थियो । आजको बैठकमा देउवा उपस्थित हुने नहुने एकीन भएको छैन । उपसभामुख नभएकाले संवैधानिक परिषदमा ५ जनामात्र छन् । बैठकको कोरम पुर्याउन ४ सदस्य चाहिन्छ ।  परिषदमा सकेसम्म सहमतिका साथ संवैधानिक आयोगका पदाधिकारी नियुक्ति सिफारिस गर्नुपर्ने प्रावधान छ ।