सशस्त्रकै सेटिङमा गौर नाकाबाट तस्करी बढ्यो, डीएसपी खतिवडा तानिए

रौतहट । भन्सारछलीका सामान भित्र्याउने गर्दा राजस्व असुली लक्ष्यअनुसार हुन सकेको छैन । कतिपय जिल्लामा सीमानाकामा भन्सारछली तस्करी नियन्त्रणका लागि खटिएको सशस्त्र प्रहरी बलकै मिलेमतोमा तस्करी हुने गरेको छ ।
सशस्त्र प्रहरी बलबाट खटिएका अधिकृतकै मिलेमतोमा गौर नाकाबाट तस्करी बढेको गुनासो बढेपछि एक डीएसपी तानिएका छन् ।

गौर नाकाबाट तस्करी भएको उजागर भएपछि छानबिनका लागि गौर भन्सारस्थित सशस्त्र प्रहरी बल नेपाल, प्रस्तावित सीमा सुरक्षा गुल्म, गौरका डीएसपी कृष्ण खतिवडा बाहिनीमा तानिएका छन् । मधेस प्रदेशस्थित सशस्त्रका डिआइजी कालिदास धौवजीले छानबिनका लागि बाहिनीमा तानेका हुन् । बाहिनीमा तानिएको बाहिनीले पुष्टि गरेको छ ।

गौर नाकामा खटिएका सशस्त्र प्रहरी मात्र होइन नेपाल प्रहरीको समेत मिलेमतोमा तस्करी भइरहेको छ । दशैं अगाडिदेखि चलेको तस्करीको लाइन अहिलेसम्म पनि यथावतरूपमा चलिरहेको छ । यस नाकाबाट कपडा, किराना लगायतका सामान बढी मात्रामा तस्करी हुँदै आइरहेको छ ।

यो नाकाबाट कपडा र किरानाको तस्करी गर्ने झण्डै २५ जनाको महिला समूह रहेको छ । यसबाहेक रोशन, रबि जैसवाल, अमरेन्द्र जैसवाललगायतका कारोबारीहरूले गौर र सँगैको महादेवपट्टीबाट खुलेआम तस्करीको लाइन पाएका छन् ।

महादेवपट्टी गौरसंँगै रहेको अर्को तस्करीको नाका हो । तस्करी गर्ने महिला समूहले स्थानीय रूपमा खटिएका नेपाल प्रहरी र सशस्त्र प्रहरीलाई बुझाउने घुसको रकम गौरकै एक रेडिमेड कपडा पसलमा जम्मा गराउने गरेको स्रोत बताउँछ ।

स्रोतका अनुसार नेपाल प्रहरी र सशस्त्र प्रहरीलाई छुट्टाछुट्टै रूपमा घुसको रकम बुझाउने गरेर उनीहरूले तस्करीको लाइन पाएको स्थानीय व्यवसायी रामजनम साह बताउँछन । भारतीय व्यापारी महेश जसले गौरमा रेडिमेड कपडाको पसल चलाएका छन्, त्यही पसलमा कारोबारीहरूले घुसको रकम जम्मा गराउंँदै आएको साहले बताए । अन्य कारोबारीहरूले भने स्थानीय प्रहरीका असई, सशस्त्र प्रहरीका डिएसपी र जिल्लाबाट खटिएका घुमुवाहरूलाई सोझै दिने गरेको पनि उनले बताए ।

गौर नाकाबाट कपडाको तस्करी गर्ने लाइन रोशन र रविले मुख्य रूपमा पाएका छन् । गौरस्थित प्रहरी र सशस्त्र प्रहरीलाई मिलाएर उनीहरूले तस्करी गर्दै आएको सुचना पाएपछि जिल्ला प्रहरी कार्यालय रौतहटका एसपी दिलिप घिमिरेले सोमबार बिहान ४ बजे जिल्लाको टोली पठाएर झण्डै ८ लाख बराबरको कपडा बरामद गरेका थिए ।

अहिले दिपावली र छठ पर्व नजिकिँदै गर्दा चिनी, रिफाइन तेल र किसमिसको तस्करी यो नाकाबाट व्यापक मात्रामा चलेको छ । यसको तस्करीको लाइन अमरेन्द्र जैसवालले पाएका छन् ।

ठूलो मात्रामा तस्करी गरेर ल्याएको सामान गौरबाट अन्य ठाउँमा चल्ने पचास भन्दा बढी बसमा हालेर अन्यत्र बजारमा पठाउने काम हुँदै आएको छ । प्रत्येक बसमा ५ देखि १० क्वीन्टल सम्म सामान बसबाट पठाउने काम हँुदै आएको छ । तस्करी गरेर भित्र्याउने र नेपाल भित्रिएपछि बील काटेर पठाउने धन्दा चलिरहेको छ । तस्करी गर्ने रोशन भारतीय हुन भने रबि र अमरेन्द्र जैसवाल नेपाली हुन् । तस्करी गरेर ल्याएको सामान एके ट्रेर्डसबाट बील काटेर अन्यत्र पठाउने गरिएको छ ।

सशस्त्र प्रहरीको गौरस्थित प्रस्तावित गुल्मबाट तस्कर देखि व्यापारीसँग भेटघाट गर्ने काम सहायक हवल्दार वीरेन्द्र साहले गर्दै आएको गुल्ममा कार्यरत एक जुनियर अफिसरले जानकारी दिए । बाहिर अरूलाई देखाउन र हाकिमलाई रिपोर्टिङ गर्ने क्रममा सहायक हवल्दार वीरेन्द्रलाई ड्राइभर हो भनेर भन्ने गरिएको छ । तर उनी घुमुवाको रूपमा पनि काम गरिरहेका छन् । गुल्मका डिएसपी र एसपीको घुमुवाको रूपमा उनलाई परिचालन गरिएको छ तर रिपोर्टिङ गर्दा ड्राइभर ।

त्यसैगरी रौतहटका सशस्त्र प्रहरीका बेशहरूको सबै उठाउने जिम्मा सहायक हवल्दार सुभाष सिंहले पाएको स्रोत बताउँछ । विगत ५ बर्षदेखि रौतहटका बेशहरूमा कार्यरत रहिरहेका उनी अहिले देवाही बेशमा कार्यरत छन् । वीरेन्द्र साहलाई जस्तै उनलाई पनि संचार दरबन्दीको भन्दै देखाउंदै सबै बेशहरूको घुमुवाको रूपमा परिचालन गरिएको छ ।

एके ट्रेर्डसले यस्ता बिल दैनिक १ सय वटा भन्दा बढी काट्ने गरेको समेत खुलेको छ । उक्त बिलको बारेमा छानबिन गरे धेरै तथ्य खुल्ने र तस्करीको सन्जाल उजागर हुने गौरका अर्का एक व्यापारी बताउँछन् ।