डीआईजी शाहले कार्यभार सम्हाल्नासाथ एपीएफ इन्टेलिजेन्स ब्यूरोको ठूलो सफलता, ठूलो परिमाणमा लागूऔषधसहित दुई पक्राउ

काठमाडौं । सशस्त्र प्रहरी बल नेपालको इन्टेलिजेन्स ब्यूरोले काठमाडौंमा ठूलो परिमाणमा लागूऔषध बरामद गर्दै दुई जनालाई पक्राउ गरेको छ ।

सशस्त्र प्रहरी नायब महानिरीक्षक (डीआईजी) दीपेन्द्र शाहले कार्यभार सम्हालेको केही दिनमै ब्यूरोले हासिल गरेको यो कारबाहीलाई महत्वपूर्ण सफलताका रूपमा हेरिएको छ ।

सशस्त्र प्रहरीका अनुसार आइतबार दिउँसो १२ः४५ बजे विशेष सूचनाका आधारमा खटिएको टोलीले काठमाडौं महानगर क्षेत्रको चन्द्रागिरी नगरपालिका–१५, ढुङ्गेअड्डाबाट लागूऔषध कारोबारमा संलग्न रहेको आरोपमा कीर्तिपुर नगरपालिका–९, पाँगादोबाटो बस्ने ३९ वर्षीय अनिल देउलालाई नियन्त्रणमा लिएको हो ।

देउलाको साथबाट ५० बक्समा रहेको १ हजार ५०० फायल (१५ हजार क्याप्सुल) ट्रामाडोल, एक थान एन्ड्रोइड मोबाइल र बा ७७ प ७८०० नम्बरको स्कुटर बरामद गरिएको सशस्त्र प्रहरीले जनाएको छ ।

प्रहरीले त्यसपछि देउलाको बयानका आधारमा चन्द्रागिरी नगरपालिका–१४, नयाँ नैकापस्थित पानीट्याङ्की नजिक रहेको डेरामा खानतलासी गर्दा उदयपुरको गाईघाट घर भएकी २४ वर्षीया सुमित्रा राईलाई पनि पक्राउ गरेको छ ।

डेराबाट १ हजार १८८ थान डाइजापाम, फेनरागन र आईपीपीएल, १ हजार ८७७ फायल (१८ हजार ७७० क्याप्सुल) ट्रामाडोल, १५० ग्राम पोलेन, विभिन्न दरका नेपाली रुपैयाँ गरी कुल १ लाख ३९ हजार १६५ नगद, एक थान एन्ड्रोइड मोबाइल र एक थान साधारण मोबाइल बरामद गरिएको प्रहरीले जनाएको छ ।

पक्राउ परेका दुवै जनामाथि लागूऔषध सम्बन्धी कसुरमा थप अनुसन्धान अघि बढाइएको सशस्त्र प्रहरीले जनाएको छ।