रवि लामिछानेलाई प्रतिशोध साँध्न पक्राउ गर्न लागिएको विपक्षी दलको ठहर, सामूहिक प्रतिवाद गर्ने

काठमाडौं । प्रतिपक्षी दलहरुले सरकारलाई जनसरोकारका विभिन्न विषयमा ज्ञापनपत्र बुझाउने निर्णय गरेको छ ।

विपक्षी दलहरुले उठाएका जनसरोकारका विषयमा सरकारको ध्यानाकर्षण गराउने निष्कर्ष निकालेको नेकपा माओवादी केन्द्रका उपमहासचिव शक्ति बस्नेतले जानकारी दिएका छन् ।

नेता बस्नेतले सरकारले जनसरोकारका विषयमा सरकारले प्रभावकारी काम नगरेमा संसदको विशेष अधिवेशन बोलाउने विषयमा समेत छलफल भएको बताए ।

उनले भने- ‘प्रतिपक्षी पार्टीहरूको तर्फबाट सरकारको ध्यानाकर्षण गराउने र ज्ञापनपत्र पेश गर्ने भन्ने समझदारी भएको छ । जनसरोकारका मुद्दामा सरकारले गम्भीरता देखाएन र सकारात्मक रेस्पोन्स गरेन भने विशेष अधिवेशन आव्हान गर्नुपर्ने परिस्थिति पनि आउन सक्छ भन्ने छलफल भयो ।’

विपक्षी दलको बैठकले राष्ट्रिय स्वतन्त्र पार्टीका सभापति रवि लामिछानेमाथि सरकारले राजनीतिक प्रतिशोध साँध्न खोजेको ठहर गरेको छ । सहकारी छानबिन संसदीय समितिले लामिछाने सहकारी ठगीमा संलग्न भएको ठोस प्रमाण पेश गर्न नसकेको अवस्थामा प्रतिशोध साध्न उनलाई पक्राउ गर्न लागिएको ठहर बैठकले गरेको छ । सत्ता जोडघटाउको अङ्कलाई लिएर ओली सरकारले बिनाआधार र प्रमाण रास्वपा सभापति रवि लामिछानेलाई प्रतिशोधको प्रयास गरेकोमा त्यसको सामूहिक प्रतिवाद गर्ने समझदारी शुक्रबारको बैठकमा बनेको माओवादी नेता शक्ति बस्नेतले बताए ।

बैठकमा नेकपा एकीकृत समाजवादी फुटाउन सरकारले अध्यक्ष जारी गर्ने तयारी गरेको विषयमा समेत छलफल भएको बुझिएको छ ।