पूर्वएआईजी ज्ञवालीसँगै सम्पत्ति शुद्धीकरणको अनुसन्धानमा तानिंदै बटु लामिछाने

काठमाडौं । नेपाल प्रहरीमा कार्यरत रहँदा विभिन्न ब्यवसायीहरुलाई दुःख दिने र सम्पत्ति शुद्धिकरणमा अनुसन्धानका लागि पठाउँदैआएका पूर्वएआईजी श्यामलाल ज्ञवाली आफैं सम्पत्ति शुद्धिकरणको झमेलामा पर्ने अवस्थामा पुगेका छन् ।

ज्ञवालीले अवैध रुपमा कमाएको करोडौं रकम बटु लामिछाने, श्रीभक्त कासिछवा, गणेश कार्की लगायतका ब्यक्तिका कम्पनीमार्फत् हाइड्रोपावरदेखि विभिन्न क्षेत्रमा लगानी गरेको विस्तारै खुल्न थालेको छ । स्रोत भन्छ–लामिछानेको लगानी रहेका अधिकांश व्यवसायमा ज्ञवाली साझेदार रहेका छन् । हाइड्रोपावर कम्पनी अन्नपूर्ण विद्युत विकास प्रालिका लामिछाने कार्यकारी अध्यक्ष हुन् । जसमा ज्ञवालीको लगानी रहेको छ । लामिछाने नेपाल भारत चेम्बर अफ कमर्स एण्ड इण्डष्ट्रिजको ऊर्जा समितिका संयोजकसमेत हुन् ।

ज्ञवालीको लामिछानेको हाइड्रोदेखि अरु केही ब्यवसायीमार्फत् दुबईसम्म लगानी रहेको सूचना पाएपछि सम्पत्ति शुद्धीकरण अनुसन्धान विभागले छानबिन सुरु गरेकोे छ । ब्यवसायी लामिछानेलाई सम्पत्तिले ताकेता गरेपछि ज्ञवाली समेत फन्दामा पर्ने देखिएको छ । स्रोतका अनुसार लामिछानेलाई सुरुमा बयानमा बोलाइसकेको छ भने अब ज्ञवाली समेत अनुसन्धानमा तानिंदैछन् । प्रहरी बृत्त बौद्धदेखि सुरु भएको ज्ञवालीको आकर्षक पोष्टिङको सिलसिला सीआईबीमा पुगेको हो । रुपन्देहीको एसपी, काठमाडौंको एसएसपी, उपत्यका प्रहरी कार्यालय रानीपोखरी हुँदै सीआईबीसम्म पुग्दा उनको ध्याउन्न कमाइतिर बढी केन्द्रित भएको देखिन्छ ।

सीआईबीमा हुँदा बाल मन्दिर प्रकरणमा ज्ञवालीले नाटकीय रुपमा भारतीय ‘रअ’को दलाली गर्ने कीर्ति पाण्डेलाई पक्राउ पूर्जी जारी गराए । र, उनैमार्फत् दर्जनौं ब्यपाारीबाट रकम असुली गरेको आरोप छ । विदेशी नागरिकलाई बयानमा बोलाएपछि पक्राउ गरी हिरासतमा राखेर अनुसन्धान गर्नुपर्छ । उसको अनुसन्धान नसकिएसम्म थुनाबाट छाड्न मिल्दैन ।

ज्ञवालीेले कीर्ति पाण्डेलाई पक्राउ पूर्जी जारी हुने अघिल्लो दिन सीआईबीमा बोलाएर फलफुल खुवाएर पठाएका थिए । जुन कुरा कीर्तिमामार्फत् मारवाडी ब्यापारीहरुसँग पैसा असुल्न रहेको तथ्य पछि खुलेको थियो । पाण्डेको नाममा नाटकीय रुपमा पूर्जी जारी गरिनुको मुख्य उद्देश्य नै उनीमार्फत् नै बालमन्दिरको जग्गा प्रकरणमा संलग्न मारबाडीसँग मोलमोलाइ गर्ने रहेको सूचना अख्तियार दुरुपयोग अनुसन्धान आयोगसम्मै पुगेको थियो ।

लामिछानेमार्फत् ज्ञवालीले कास्कीको अन्नपूर्ण गाउँपालिकामा निर्माण हुने ८६.५ मेगावाटको लान्द्रुक मोदी जलविद्युतमा करोडौं लगानी गरेका छन । लान्द्रुक जलविद्युत आयोजनामा सिंगटी हाइड्रो इनर्जी लिमिटेडको मुख्य लगानी रहेको छ । त्यस्तै भक्तपुरका व्यापारी श्रीभक्त कासिछवाको ब्यवसायमा पनि ज्ञवाली जोडिएको सूचना अख्तियारमा पुगेको छ ।

त्यसो त ज्ञवालीले दुबईस्थित एमएस ट्रेडर्स नामक कम्पनी सञ्चालन गर्ने महेन्द्र सिंहमार्फत् पनि ठूलो लगानी गरेको स्रोतको दाबी छ । भारतको बैंगलोर घर भएका महेन्द्र दुबई बसेर सुन तस्करी, क्रिप्टोकरेन्सीको कारोबार गर्ने गर्दछन् । स्वतन्त्र ऊर्जा उत्पादकहरूको संस्था नेपाल (इप्पान)का अध्यक्ष गणेश कार्कीसँग पनि ज्ञवाली जोडिन पुगेको सूचना अख्तियारमा पुगेको छ ।

ज्ञवालीले जागिरका दौरान कमाएको अनियमितताको रकम हाइड्रोदेखि विभिन्न सेक्टरमा लगानी गरेको तथ्य एआईजी टेकप्रसाद राईको छानबिनका क्रममा पनि खुलेको थियो । तर राईको प्रतिवेदन आईजीपी बसन्तबहादुर कुँवरले उक्त फाइल रोकेर ज्ञवालीलाई उन्मुक्ति दिएको आरोप पनि छ ।

अख्तियारले पनि १ महिनाअघि ज्ञवालीसँग जोडिएका ब्यक्तिहरुको सम्पत्ति छानबिन गर्न सीआईबीदेखि सम्पत्ति शुद्धीकरण अनुसन्धान विभागलाई पत्र लेखिसकेको छ ।  ज्ञवाली अघिल्लो सरकारमा रवि लामिछाने र नेकपा नारायणकाजी श्रेष्ठ गृहमन्त्री भएको समयमा नेपाल प्रहरीभित्र समानान्तर सत्ता चलाएर आईजीपी हुने चलखेलमा लागेका थिए ।

ज्ञवालीलाई आईजीपी बनाउन सूर्य नेपालका कर्मचारी तथा यति डिष्टीलरी र चण्डिका डिष्टिलरीका संचालक रवि केसीसमेत करोडौंको थैली बोकेर शक्तिकेन्द्रमा पुगेको समाचार त्यतिबेला आएको थियो । दुबै डिष्टीलरीमा पनि ज्ञवालीको लगानी रहेकैले आईजीपी बनाउने चलखेलमा रवि केसीको दौडधूप चलेको थियो ।