काठमाडौं । कोरोना संक्रमणका कारण अवस्था गम्भीर भइ भेन्टिलेटरमा राखिएका नेपाली कांग्रेसका नेता मीन विश्वकर्माको स्वास्थ्य अवस्था सुधार भएको छ । उपचारमा संलग्न चिकित्सकहरुका अनुसार उनलाई ७२ घण्टाको लागि भेन्टिलेटरबाट निकालिएको हो ।
भेन्टिलेटरमा उनलाई कृत्रिम श्वासप्रश्वास दिइएको थियो । अब आईसीयूमा उनलाई श्वासप्रश्वासमा समस्या नभए भेन्टिलेटरमा राख्नु नपर्ने बताइएको छ । यसअघि कात्तिक १ गते कोरोना संक्रमण पुष्टि भएपछि विश्वकर्मा आफ्नै निवासमा आइसोलेसनमा बसेका थिए । उनको स्वास्थ्य अवस्था बिग्रँदै गएपछि संसद सचिवालयका चिकित्सकले कात्तिक ८ गते अक्सिजन लिएर बस्न सल्लाह दिएका थिए ।
अहिले उनी कोरोना संक्रमण मुक्त भैसकेका छन् । तर फोक्सोमा समस्या आएकाले अझै उपचार जारी रहेको छ । ग्राण्डी अस्पतालमा उपचाररत उनको एक साता अघि होस खुलेको र अहिले अलिअलि बोल्न सकेको बताइन्छ।
