आइतबारदेखि नारायणगढ–मुग्लिन सडक २४ सै घण्टा सञ्चालनमा आउने

काठमाडौँ। नारायणगढ–मुग्लिन सडकखण्डको तुइन खोलामा पुल निर्माण कार्यका लागि कडा चट्टानी पहाड फुटाउने काम अन्तिम चरणमा पुगेपछि उक्त सडक आइतबारदेखि २४ सै घण्टासञ्चालनमा आउने तथा खुला रहने भएको छ ।

चट्टानी पहाड फुटाउने काम अन्तिम चरणमा पुगेको जानकारी सडक डिभिजन भरतपुरले दिएको हो ।

हरेक दिन मध्यान्ह १२ देखि अपराह्न ४ बजेसम्म आवागमन बन्द हुँदै आएको सडक आइतवारदेखि २४ सै घण्टा खुला रहने नागढुंगा–मुग्लिन सडक योजना (पश्चिमखण्ड)का सूचना अधिकारी ई कृष्णप्रसाद आचार्यको भनाइ उद्धृत गर्दै सडक डिभिजन भरतपुरले जनाएको छ ।

‘नारायणगढ–मुग्लिन सडकखण्डको तुइन खोलामा पुल निर्माण कार्यका लागि कडा चट्टानी पहाड फुटाउने कार्य लगभग अन्तिम चरणमा पुगेको जानकारी गराउँदछौँ,’ आचार्यले भनेका छन्, ‘दिनको १२ देखि ४ बजेसम्म आवागमन बन्द हुँदै आएको सडक यही फागुन १३ गते आइतबारदेखि २४ सै घण्टा सडक आवागमन खुला रहने कुराको समेत जानकारी गराउदछौँ ।’