कैलालीको चुरेमा सडक खन्दा विस्फोट, ४ जना घाइते

काठमाडौँ। कैलाली जिल्लाको चुरे गाउँपालिका वडा नम्बर ३ सहजपुर क्षेत्रमा बाटो मर्मत गर्ने क्रममा अर्थात् सडक खन्दा विस्फोट भएको छ ।

भीमदत्त राजमार्गम मर्मतका लागि डोजरले खन्दा बुधबार साँझ विस्फोट भएको कैलालीका प्रहरी प्रवक्ता तथा प्रहरी नायव उपरीक्षक कुलदीप चन्दले बताए ।

ठेकेदार दिलराज जोशीले सडक ग्राबिल गर्न जेसीबीले खानाउने क्रममा जमिन भित्रबाट नाम नखुलेको विस्फोटक पदार्थ पट्किएको जानकारी दिए । सडक चौडा तथा मर्मत गरिरहेको जेसीबीले सडक खन्ने क्रममा अचानक विष्फोट हुँदा चालकसहित चार जना घाइते भएका छन् ।

घाइते हुनेमा कैलालीको चुरेका वर्ष ४५ का वसन्त खडायत, सुर्खेत घर भई हाल कञ्चनपुर बस्ने रोलर अपरेटर २२ वर्षीय हिरा थापा र विराटनगर घर भई हाल कञ्चनपुर बस्ने वर्ष ३५ का नवीन देव अवस्थी रहेको डीएसपी चन्दले बताए ।

घाइते चार जनामध्ये जेसीबी चालक डडेल्धुराको आलिताल गाँउपालिका ८ का २४ वर्षीय विकास थापाको अवस्था सामान्य रहेको प्रहरीले जनाएको छ । थापाको सहजपुरस्थित स्वास्थ्य चौकीमा उपचार गरिएको छ ।

अन्य तीन जना घाइतेको धनगढीको मायामेट्रो अस्पतालमा उपचार भइरहेको डीएसपी चन्दले बताए । यस सम्बन्धमा प्रहरीले थप अनुसन्धान गरिरहेको छ ।