संघीय संसद् सचिवालयको महासचिवमा पाण्डेय नियुक्त

काठमाठौं । संघीय संसद् सचिवालयको महासचिव पदमा पद्‌मप्रसाद पाण्डेय नियुक्त भएका छन् ।

पाण्डेयलाई नेपालको संविधानको धारा १०६ को उपधारा (१) बमोजिम महासचिवमा नियुक्त गरिएको राष्ट्रपतिको कार्यालयले जनाएको छ ।

प्रतिनिधिसभाका सभामुख देवराज घिमिरे र राष्ट्रियसभा अध्यक्ष गणेशप्रसाद तिमिल्सिनाले गत मंसिर २४ मा पाण्डेयलाई महासचिव नियुक्त गर्न सिफारिस गरेका थिए ।

तर, राष्ट्रपति रामचन्द्र पौडलले उनको नियुक्ति सिफारिसको कानुनी रितमा प्रश्न उठाउँदै आएका थिए ।

मंगलबार मात्र पाण्डेयले प्रतिनिधिसभाको सचिवबाट राजीनामा दिएका थिए । राजीनामा स्वीकृतिसँगै राष्ट्रपतिले उनलाई महासचिवमा नियुक्त गरेका हुन् ।

उनको स्थायी घर पाल्पाको रिब्दिकोट गाउँपालिका–१ मा पर्छ ।

हेर्नुहोस् राष्ट्रपति कार्यालयको विज्ञप्ति