बैतडीमा जीप दुर्घटना हुँदा चालकसहित दुईजना घाइते

बैतडी । बैतडीमा जीप दुर्घटना हुँदा दुईजना घाइते भएका छन् । जिल्लाको पाटन नगरपालिका–३ को धुरा भन्ने स्थानमा जीप दुर्घटनामा परी चालकसहित दुईजना घाइते भएका हुन् ।

घाइते हुनेमा चालक समेत रहेका सुर्नया गाउँपालिका–५ का कृष्णबहादुर बिष्ट र पाटन–३ का धनीराज पन्त रहेको जिल्ला प्रहरी कार्यालय बैतडीका सूचना अधिकारी,प्रहरी निरीक्षक, खेमबिक्रम केसीले जानकारी दिए ।

खोडपेबाट बोहोरीगाउँतर्फ गइरहेको सु.प.प्र. ०४००१ च ०१०७ नम्बरको बोलेरो जीप सोमबार बिहान करिब ४ बजेतिर पाटन–३ को धुरा भन्ने स्थानमा दुर्घटना परेको हो । उक्त जीपमा चालकसहित दुईजना मात्रै सवार रहेको बताइएको छ ।

घाइते पन्तको अवस्था गम्भीर रहेको र उनलाई धनगढी रेफर गरिएको छ । चालक बिष्टको डडेल्धुरामा उपचार भइरहेको छ । जीप सडकबाट करिब ७० मिटर तल खसेको छ ।

उक्त दुर्घटनाको कारण भने खुल्न सकेको छैन ।