रुकुम पश्चिममा युवाबीच झगडा भएको सूचनापछि घटनास्थल पुगेका प्रहरीमाथि नै आक्रमण, २ जना घाइते

रुकुम पश्चिम । रुकुम पश्चिमको बाँफिकोट गाउँपालिकामा स्थानीयको आक्रमणबाट ड्युटीमा खटिएका दुई प्रहरी जवान घाइते भएका छन् ।

घाइते हुनेमा इलाका प्रहरी कार्यालय बाँफिकोटमा कार्यरत प्रहरी जवान महेन्द्रबहादुर शाही र हिमराज खड्का रहेका छन् ।

आइतबार साँझ बाँफिकोट–३ स्यार्पु ताल नजिकै स्थानीयबीच भएको विवादबारे बुझ्न पुगेका शाही र खड्कालाई स्थानीयले आक्रमण गरेका थिए ।

उनीहरुको टाउकोमा चोट लागेको जिल्ला प्रहरी कार्यालय रुकुम पश्चिमले जनाएको छ ।

स्थानीय युवाबीच झगडा भएको भन्ने सूचनाका आधारमा घटनास्थल पुगेर प्रहरीले सम्झाइ–बुझाइ गर्न खोज्दा उल्टै प्रहरी माथि आक्रमण भएको बताइएको छ ।

अहिले घाइतेलाई उपचारका लागि नेपालगञ्ज लगिएको छ ।

साथै प्रहरीले उक्त घटनाबारे थप अनुसन्धान थालेको छ ।