राष्ट्रियसभा निर्वाचनमा धरानका मेयर हर्क साम्पाङले पनि मतदान नगर्ने

विराटनगर । सुनसरीको धरान उपमहानगरपालिकाका मेयर हर्क साम्पाङले पनि राष्ट्रियसभा सदस्य निर्वाचनमा मतदान नगर्ने भएका छन् । कार्यव्यस्तता देखाउँदै साम्पाङले उक्त चुनावमा मतदान नगर्ने भएका हुन्।

“म आफ्नै काममा व्यस्त रहेकोले मत हाल्न जान भ्याइनँ,” उनले भने ।

विराटनगरस्थित प्रदेश निर्वाचन कार्यालयमा बिहीबार बिहान ९ बजेदेखि मतदान जारी छ । दिउँसो ३ बजेसम्म मतदानको समय निर्धारण गरिएको निर्वाचन आयोगले जनाएको छ ।

कोसी प्रदेशसभाका सबै ९३ सांसदले मतदान गरिसकेका मुख्य निर्वाचन अधिकृतको कार्यालयले जानकारी गराएको छ ।

कार्यालयका अनुसार, १३७ स्थानीय तहतर्फका १० जनाले मतदान गर्न बाँकी छ ।