सिन्धुलीमा ट्याक्टरले २ मोटरसाइकललाई ठक्कर दिँदा एकजनाको मृत्यु

काठमाडौँ। ट्याक्टरको ठक्करबाट सिन्धुलीमा मोटरसाइकल चालकको मृत्यु भएको छ।

मंगलबार बेलुका पौने ८ बजे सिन्धुलीको भिमानमा प्र २–०४–००१ ट ००१० नम्बरको ट्याक्टरले दुईवटा मोटरसाइकललाई ठक्कर दिएको थियो।

डगाबाट भिमानतर्फ जाँदै गरेको उक्त ट्याक्टरले विपरीत दिशातर्फ जाँदै गरेको बा ५८ प ९१४१ र ना ११ प ५७५० नम्बरको मोटरसाइकललाई ठक्कर दिएको सिन्धुलीका प्रहरी प्रमुख एसपी राजकुमार सिलवालले बताए।

ठक्करबाट बा ५८ प ९१४१ नम्बरमा सवार रौतहटको गुजरा नगरपालिका-२ का ६३ वर्षीय रणे तामाङ र ना ११ प ५७५ मोटरसाइकलका चालक मकवानपुरको मकवानपुरगढी गाउँपालिकाका ६३ वर्षीय विष्णुबहाजुर थिङ घाइते भएका थिए।

उनीहरूलाई मंगलबार नै उपचारका लागि सिन्धुली अस्पतालमा लगिएकोमा साढे ८ बजे तामाङको मृत्यु भएको एसपी सिलवालले जानकारी दिए। सामान्य घाइते भएका थिङ उपचारपछि डिस्चार्ज भइसकेका छन्।

ट्याक्टर चालक पुष्पलाल अधिकारीलाई नियन्त्रणमा लिएर घटनाको अनुसन्धान भइरहेको प्रहरीले जनाएको छ ।