राष्ट्रपति कार्यालयको ट्वीटर अकाउन्ट बन्द

काठमाडौं । राष्ट्रपति कार्यालयले सञ्चालनमा ल्याएको ट्वीटर अकाउन्ट बन्द भएको छ। 

राष्ट्रपति विद्यादेवी भण्डारीसँग सम्बन्धित सूचनाहरू प्रवाह गर्न कार्यालयले शितल निवास @SHITALNIWAS नामबाट ट्वीटर अकाउन्ट सञ्चालनमा ल्याएको थियो। भेरिफाइड भैसकेको अकाउन्ट अन्तत: डिएक्टिभेट भएको छ। 

राष्ट्रपतिका सञ्चार विज्ञ टिका ढकालले अकाउन्टमाथि दुई देखि तीन पटक साइबर हमला भएको बताए। 

ढकाल झण्डै एक महिना अघिमात्र राष्ट्रपति कार्यालयमा प्रेस विज्ञका रुपमा नियुक्त भएका थिए। आफूले नै पहिला  दर्ता भएर सञ्चालनमा नरहेको अकाउन्टलाई सक्रिय बनाउने काम गरेको उनले उल्लेख गरे। 

राष्ट्रपतिको प्रेस सचिवालयले सञ्चालन गर्ने गरी चलाइएको अकाउन्टबाट सेयर भएका केही सामग्री विवादीत भएका थिए। एउटा अनलाइन पोर्टलको समाचार सेयर गरिएपछि धेरैले अकाउन्ट सञ्चालनको तौर तरिकामाथि समेत प्रश्न उठाएका थिए। 

राष्ट्रपतिको छुट्टै ट्विटर ह्याण्डल @presidentofnp सञ्चालनमा छ। त्यसलाई पनि भेरिफाइ गराउने प्रक्रिया अगाडि बढाएको ढकालले बताए।