नेपालफेसको समाचारप्रति सशस्त्र प्रहरी सहायक हवल्दार ठकुराईको आपत्ति

काठमाडौं । नेपालफेस डटकममा प्रकाशित समाचारप्रति सशस्त्र प्रहरी सहायक हवल्दार इमाम मियाँ ठकुराईले आपत्ति जनाएका छन् । नेपालफेस डटकममा २०८० पुस २२ गते मंगलबार ‘सेटिङमा तस्करी, बाहिनीमा तानिएका सशस्त्रका डिएसपी र इन्स्पेक्टर पुनः फिर्ता’ भन्ने शीर्षकमा प्रकाशित समाचारप्रति ठकुराईले आपत्ति जनाएका हुन् ।

ठकुराईले नेपालफेस डटकमको आधिकारिक इमेलमा खण्डनपत्र पठाउँदै उक्त समाचार कपोलकल्पित, आधारहीन तथा तथ्यहीन रहेको उल्लेख गरेका छन् । उनले पठाएको खण्डनपत्रमा भनिएको छ–‘तपाईंको अनलाइन पोर्टलमा उल्लिखित मितिको ‘सेटिङमा तस्करी, बाहिनीमा तानिएका सशस्त्रका डिएसपी र इन्स्पेक्टर पुनः फिर्ता’ शीर्षकको समाचारमा पत्रकार आचार संहिता २०७३ लाई कति पनि ख्याल नगरिकन एकपक्षीय रुपमा मेरो व्यक्तिगत चरित्रहत्या एवं संगठनको छविमा समेत प्रश्नचिन्ह उठ्नेगरी प्रकाशित समाचारप्रति मेरो तथा सिंगो संगठनको समेत गम्भीर ध्यानाकर्षण भएको व्यहोरा अवगत गराउन चाहन्छु ।’

त्यसैगरी खण्डनमा भनिएको छ–‘म विगत १४ बर्षदेखि संगठन, देश र देशवासीको सेवा र सुरक्षामा अनवरत खटिइरहेको सशस्त्र प्रहरी कर्मचारी हँु । पेशाको यो जीवनमा संगठनको नीति, निर्देशन तथा आचार संहिता अनुसार माथिल्लो कमाण्डरले अहाएको काम त्रुटिरहित ढंगबाट सम्पादन गरी अलग छवि निर्माण गर्न सफल सप्रक हुँ ।

बाथ रोगको कारण बेला बखत अस्पताल धाइरहनुपर्ने भएको कारण म हाल कान, हड्डी तथा वाथरोगको सशस्त्र प्रहरी हस्पिटल, वलम्वुमा रमाना लिई नेपाल एपिएफको लाइन व्यारेकमा बसी उपचाररत भै कार्यरत छु । सप्रवल नेपाल प्रधान कार्यालयबाट अनुगमनार्थ टोली खटाएको हुन सक्छ । तर त्यसमा मलाई कहीँ कतैबाट खटाएको छैन । यस्तो अवस्थामा मेरो फोटोको समेत दुरुपयोग गरी आपराधिक मनसायले मेरो नाम जोड्ने लगायत उक्त समाचारमा उल्लिखित विबरणको कुनै पनि सत्यता तथ्य नभएको समेत प्रष्ट पार्दछु ।’