समानुपातिक निर्वाचन प्रणालीका लागि संघर्ष गर्नुपर्छः मन्त्री श्रेष्ठ

काठमाडौं। बागमती प्रदेश सरकारका आन्तरिक मामिला तथा कानुनमन्त्री गंगानारायण श्रेष्ठले समानुपातिक निर्वाचन प्रणालीका लागि संघर्ष गर्नुपर्ने बताएका छन् । आज द्वन्द्व पीडित महिला राष्ट्रिय सञ्जालद्वारा आयोजित कार्यक्रममा बोल्दै मन्त्री श्रेष्ठले यस्तो बताएका हुन् ।

उनले आजसम्मका सबै राजनीतिक परिवर्तनहरुको हकदार स्वतः महिला हुनुपर्ने भए पनि त्यस्तो हुन नसकेको भन्दै महिलाहरूलाई अहिलेको मिश्रित निर्वाचन प्रणालीलाई परिवर्तन गरी प्रत्यक्ष प्रतिस्पर्धासहितको समानुपातिक निर्वाचन प्रणालीका लागि संघर्ष गर्न अपिल गरे । उनले महिला सहभागिता र उनीहरूलाई अवसर, पहुँच र अधिकारको हिसाबबाट हेर्दा परिवार, समाज, राजनीतिक पार्टीहरू र राज्यले न्याय गर्न नसकेको बताए ।

उनले समानुपातिक निर्वाचन प्रणालीले धेरै महिलालाई राजनीतिमा समावेश गराए पनि प्रत्यक्ष निर्वाचनमा अझै महिलाको नेतृत्वलाई स्विकार्न नसकेको बताए ।