प्रदेशलाई संविधान प्रदत्त अधिकार हस्तान्तरण नगरे सङ्घर्षमा उत्रिने मुख्यमन्त्रीको चेतावनी

काठमाडौं । कोशी प्रदेशका मुख्यमन्त्री केदार कार्कीले संविधान प्रदत्त अधिकार केन्द्रले हस्तान्तरण नगरे सङ्घर्षमा उत्रिने चेतावनी दिएका छन् । सुनसरीको भोक्राहा नर्सिंहमा निर्माण गरिएको ४०० केभिएको विद्युत् प्राधिकरणको सवस्टेशन उद्घाटन समारोहमा मुख्यमन्त्री कार्कीले यस्तो बताएका हुन् ।

उनले प्रदेशलाई संविधानले दिएको अधिकार चाँडो हस्तान्तरण गरिदिन प्रधानमन्त्री पुष्पकमल दाहाललाई आग्रह गरेका छन् ।

‘संविधानमा पाएको अधिकार हस्तान्तरण गरी तीनै तहको सरकारलाई सहकार्यका साथ काम गर्ने वातावरण बनाइदिन प्रधानमन्त्री ज्यूलाई आग्रह छ, उनले भने, ‘अधिकार हस्तान्तरण नगरि दिए सदन र सडकबाट सङ्घर्ष गर्छु ।’

उनले संविधानले तोकेअनुसार २५ मेगावाट सम्मको विद्युत् प्रदेशले नै उत्पादन गर्न सक्ने र लाइसेन्स दिन सक्ने अधिकार पाउनु पर्ने बताए । उनले भने, ‘त्यसका लागि सङ्घीय सरकार र सङ्घीय संसदसँग सहकार्य सङ्घर्ष दुबै गर्नुपर्ने छ ।’

सवस्टेशन उद्घाटनपछि कोशी प्रदेशमा रहेका उद्योगी तथा व्यवसायी ढुक्क हुने अवस्था आएको मुख्यमन्त्री कार्कीले बताए ।