काठमाडौं । कैलालीमा असई हत्या प्रकरणमा संलग्न भएको आशंकामा प्रहरीले ११ जनालाई नियन्त्रणमा लिएको छ । गएराति कैलालीमा तस्कर समूहले एक प्रहरीको हत्या गरेको विषयमा अनुसन्धानका क्रममा ११ जनालाई प्रहरीले नियन्त्रणमा लिएको प्रहरीले जनाएको छ ।
गएराति धनगढी उप-महानगरपालिका १२ को अस्थायी प्रहरी बिट जुगेडामा कार्यरत प्रहरी सहायक निरीक्षक (असई) गोविन्द विक र प्रहरी जवान रामबहादुर साउद ड्युटीमा निस्किएका थिए ।
जसमध्ये एकजनाको शव आइतबार बिहान मोहना नदीमा भेटिएको थियो ।
प्रहरी जवान रामबहादुर साउद भने अझै फेला परेका छैनन् । तर उनले प्रयोग गर्ने गरेको मोबाइल भने फेला परेको छ । उनको खोजी कार्य भैरहेको प्रहरीले जनाएको छ । तस्कर समूहले प्रहरीको हत्या गरी पानीमा फालेको हुनसक्ने प्रहरीको दावी छ ।
