कञ्चनपुर । धनगढीको मोहना नदी किनारमा भेटिएको शव वेपत्ता प्रहरी सहायक निरीक्षक गोविन्द बिकको भएको पुष्टि भएको छ ।
मोहना नदीको किनारमा घोप्टो अवस्थामा भेटिएको शव वेपत्ता प्रहरी सहायक निरीक्षक बिकको भएको सुदूरपश्चिम प्रदेश प्रहरी कार्यालयका प्रवक्ता प्रहरी वरिष्ठ उपरीक्षक मुकेशकुमार सिहले जानकारी दिए ।
धनगढी उपमहानगरपालिका–१२ को जुगेडास्थित अस्थायी प्रहरी विटको इन्चार्ज समेत रहेका प्रहरी सहायक निरीक्षक (असई) बिकको घाँटीमा चोट रहेको उनको भनाई छ ।
उनीसँगै ड्युटीमा खटिएका बेला वेपत्ता भएका प्रहरी जवान रामबहादुर साउदको अवस्था भने अज्ञात रहेको छ । चौकीबाट मोटरसाइकलमा राति साढे ८ बजे गस्तीमा निस्किएका दुवै जना साढे १० बजेदेखि सम्पर्कविहीन भएको बताइएको छ ।
आइतबार बिहान उनीहरूको खोजी गर्दा चौकीबाट १ किमिको दूरीमा उनीहरू चढेको बा ५८ प ५२८४ नम्बरको मोटरसाइकल फेला परेको र करिब तीन किलोमिटर दूरीमा रहेको मोहना नदीमा (असई) बिकको शव फेला परेको हो ।
बेपत्ता साउँदको खोजी कार्य जारी रहेका प्रहरी वरिष्ठ उपरीक्षक सिहले बताए । तस्करहरूसँगको भिडन्तमा उनीहरू मारिएको हुन सक्ने आशंका प्रहरीको छ ।
