चौथो नम्बरका उपरथी ढकालको सेनापति बन्ने मोहले सेनामा भाँडभैलो

काठमाडौँ । नेपाली सेनाका उपरथी ताराध्वज पाण्डेलाई जंगीअड्डाले रथी बढुवा सिफारिस गरेको २४ दिनपछि राजीनामा दिनुपर्ने अवस्थामा पुर्यायो ।

नागरिकता विवादमा पाण्डेले रथी सिफारिस भइसकेपछि राजीनामा दिने अवस्थामा निम्तिनुमा प्रधानसेनापति प्रभुराम शर्माकै चाहनाले काम गरेको चर्चा सेनाभित्र हुने गरेको छ । सेनामा अधिकृतदेखि उपथी हुँदासम्म र म्यादथप गर्दा पनि त्यही नागरिकताका आधारमा हुने तर रथी बढुवामा भने विवाद निकालिनुमा सैनिक नेतृत्व पाण्डेलाई सेनापति हुन नदिने पक्षमा थियो भन्ने छर्लङ्ग हुन्छ ।

उपरथी पाण्डेले राजीनामा दिएसँगै सेनामा दोस्रो, तेस्रो होइन, चौथो नम्बरका उपरथी सन्तोषकुमार ढकालले रथी बढुवा हुन चलखेल गरेका छन् । मुख्यसचिव बैकुन्ठ अर्यालका निकट ढकालले ताराध्वज पाण्डेको राजीनामासँगै सिग्देलको जन्ममिति विवाद उछालेर उनलाई समेत जान बाध्य बनाउने खेल खेल्दैआएका छन् ।

अर्का उपरथी निर्मल थापाको त शैक्षिक प्रमाण नै नक्कली भएकाले उनलाई पन्छाउन झन् सजिलो हुने ठानेर उपरथी ढकाल योजनाबद्ध रुपमा लागेका छन् । सिग्देललाई बिदा गर्न सके थापालाई गाह्रो नहुने निष्कर्षका साथ उनी लागेका छन् । एक महिनाअघि म्याद नथपिएको भए अवकाश भइसकेका उपरथी ढकालले सेनापति बन्ने लालसा राखेर सिग्देलको नागरिकताको विवाद उछालिएको छ । ढकालले रक्षा मन्त्रालय सम्हालेको कांग्रेस पार्टीका नेताहरुलाई समेत आफूलाई सेनापति बनाउनका लागि प्रभावमा पारिसकेका छन् ।

सिग्देलको नागरिकतामा जन्ममिति २०२३ माघ १० गते र शैक्षिक प्रमाणपत्रमा २०२१ माघ १० गते रहेको प्रचार भइरहेको छ । तर रक्षा मन्त्रालयका अधिकारीले बाहिर त्यस्तो प्रचार गरिएको भए पनि अभिलेखमा उनको जन्ममिति र शैक्षिक प्रमाणपत्रमा एउटै जन्ममिति भएको दाबी गर्दछन् ।

रक्षा मन्त्री पूर्णबहादुर खड्का, सचिव किरणराज शर्मा र सेनापति प्रभुराम शर्माबीच शुक्रबार भएको छलफलपछि सोही दिन उपरथी अशोकराज सिग्देल रथी पदमा बढुवाका लागि सिफारिस भएका छन् ।