हमासले चार दिनभित्र ५० बन्धकलाई रिहा गर्ने

काठमाडौं । इजरायली प्रधानमन्त्रीको कार्यालयका अनुसार प्यालेस्टिनी लडाकु समूह ‘हमास’ले बन्धक बनाएकामध्ये ५० जनालाई चार दिनभित्र रिहा गर्ने भएको छ । यस क्रममा अस्थायी रुपमा युद्ध रोकिने पनि इजरायली प्रधानमन्त्रीको कार्यालयले जनाएको छ ।

इजरायलको मन्त्रिपरिषद बैठकले उक्त सम्झौतालाई अनुमोदन गरेसँगै यसको औपचारिक जानकारी दिइएको हो । इजरायली प्रधानमन्त्रीको कार्यालयले यसबारे औपचारिक जानकारी दिँदै भनेको छ, ‘इजरायल सरकार सबै बन्धकको रिहाइका लागि प्रतिबद्ध छ, आज सरकारले यो उद्देश्य पूरा गर्नका लागि पहिलो चरणको रुपरेखालाई मन्जुरी दिएको छ ।’

उता, हमासले पनि विज्ञप्ति जारी गर्दै मानवीय आधारमा युद्धविरामका लागि सहमति भएको जनाएको छ ।