९५ हजार टन चामल आयात गर्न दिने भारत सरकारको निर्णय

काठमाडौँ। भारत सरकारले चामल निर्यातमा रोक लगाउने नीतिलाई संशोधन गर्दै यो वर्ष नेपालका लागि ९५ हजार टन चामल निर्यात गर्न दिने निर्णय गरेको छ ।

भारतको विदेश व्यापार महानिर्देशनालयले बुधबार एक सूचना जारी गर्दै नेपालसहित सात देशलाई निर्यातमा लगाएको रोकसम्बन्धी नीतिलाई संशोधन गरेको जनाएको हो । तर, भारतले बासमतीबाहेकका मोटा चामल मात्रै निर्यातका लागि खुला गरेको जनाएको छ ।

भारतले बासमतीबाहेकको चामल निर्यातमा खुकुलो नीति लिए पनि नेपाललाई भने खासै असर नपर्ने अधिकारीहरू बताउँछन् । नेपालबाहेक क्यामरुनलाई एक लाख ९० हजार टन, आइभोरिकोस्ट र गिनियालाई समान एक लाख ४२ हजार टन, मलेसियालाई एक लाख ७० हजार टन, फिलिपिन्सलाई दुई लाख ९५ हजार टन र सिसेल्सलाई आठ सय टन चामल निर्यातका लागि खुला गरेको महानिर्देशनालयले सूचनामार्फत जनाएको छ ।

भारतले चामल निर्यातमा रोक लगाएपछि नेपाली बजारमा मागअनुसार आपूर्ति गर्न कठिनाइ भएको भन्दै मूल्य बढाइएको छ ।