सुन तस्करी प्रकरण : मुद्दा दर्ता गर्न सरकारी वकिल जिल्ला अदालतमा 

काठमाडाैं | त्रिभुवन विमानस्थल बाहिरबाट समातिएको ६० केजी ७ सय ग्राम सुन तस्करी गर्नेविरुद्ध मुद्दा लिएर सरकारी वकिल आज काठमाडौं जिल्ला अदालत पुगेका छन् ।

जिल्ला सरकारी वकिलको कार्यालयका प्रमुख अच्युतमणि नेपाउने उक्त मुद्दा लिएर सरकारी वकिलहरू अदालत पुगेको जानकारी दिए ।

नेपाल प्रहरीको केन्द्रीय अनुसन्धान ब्यूरोले दिएको प्रतिवेदनमा सामान्य थपघट गरेर मुद्दा दर्ता गर्न लागिएको सरकारी वकिल कार्यालय स्रोतले जानकारी दियो ।

विमानस्थल भन्सार कार्यालय बाहिरबाट साउन २ गते स्कूटरको ‘ब्रेक सू’मा ल्याइएको सुन समातिएको थियो ।

राजस्व अनुसन्धान विभागले समातेको सुन सम्बन्धमा पछि सीआईबीले अनुसन्धान गरेको थियो ।

उक्त प्रकरणमा पक्राउ परेका ३२ र फरार १८ जना गरी ५० जनालाई प्रतिवादी बनाउनुपर्ने राय सीआईबीको थियो ।