नयाँ बानेश्वरमा लघुवित्तपीडितले गरे प्रदर्शन

काठमाडौं । लघुवित्त तथा वित्तीय संस्थापीडित संघर्ष समितिले आज (बुधबार) पनि काठमाडौँमा आन्दोलन गरेका छन्।

न्याय माग्दै विभिन्न ठाउँबाट आएका पीडितहरू माइतीघरमा सेल्टर बनाएर दिनहुँ प्रदर्शनमा उत्रिएका छन् । त्यही क्रममा संसद भवन घेराउ गर्न आउँदै गर्दा एभरेष्ट होटलअगाडि प्रहरीले उनीहरूलाई अवरोध गरेको छ । प्रतिकारमा उत्रिएका प्रदर्शनकारीले प्रहरीको ब्यारिगेट तोड्न खोजिरहेका छन् । प्रहरीसँग प्रदर्शनकारीको घम्साघम्सी परेको छ ।

घेरा तोडेर संसद भवनको गेटमा पुगेका केही पीडितहरूलाई भने प्रहरीले पक्राउ गरेको छ ।

लुघवित्तलाई खारेज गर्नुपर्ने, सावाँसहित व्याज मिनाहा गर्नुपर्ने, पीडितलाई न्याय दिनुपर्ने र ऋण उठाउने क्रममा आफूहरूमाथि दुर्व्यवहार गर्नेलाई कारबाहीको माग पीडितहरूले राखेका छन् ।