शव लिन गएका हेलिकप्टर खराब मौसमका कारण दुर्घटनास्थल पुग्न सकेनन्

काठमाडौँ। मनाङ एयर हेलिकप्टर दुर्घटनामा मृत्यु भएकाहरुको शव लिन गएका दुई हेलिकप्टर खराब मौसमका कारण दुर्घटनास्थलमा पुग्न सकेका छैनन्।

लिखुपिके गाउँपालिका-५ लामजुरा डाँडास्थित दुर्घटनास्थलमा अल्टिच्युट एयरको दुईवटा हेलिकप्टर मौसमका कारण पुग्न नसकेको नागरिक उड्डयन प्राधिकरणले जानकारी दिएको छ।

दुर्घटनास्थल जान नसकेपछि सोलुखुम्बुकै भकञ्जेमा अवतरण गरिएको छ। घटनास्थलमा स्थानीय र प्रहरी खटिएका छन्।

प्राधिकरणका अनुसार उनीहरूको सहयोगमा शवलाई गाडीमा हालेर भकञ्जेसम्म ल्याउने तयारी छ।

त्यहाँबाट शवलाई हेलिकप्टरमार्फत् काठमाडौं ल्याउन लागिएको हो। प्राधिकरणले सिम्रिक एयरको अर्को हेलिकप्‍टर पनि परिचालन गरेको छ।

मंगलबार बिहान १० बजे सोलुखुम्बुको सुर्केबाट उडेको ‘नाइन एनए–एमभी’ हेलिकप्टर सवा १० बजे सम्पर्कविहीन भएको थियो।

सम्पर्कविहीन भएको हेलिकप्टर लामजुरामा दुर्घटना भएको खबर पाएपछि प्रहरीको टोली पुगेको हो। दुर्घटना हुँदा पाइलट चेतबहादुर गुरूङ र पाँच मेक्सिकन नागरिकको मृत्यु भएको छ।