बेटिङ प्रकरणमा पक्राउ परेका कलाकारमाथि अनुसन्धान सकियो, एक वर्ष कैद माग गर्न प्रहरीको राय

काठमाडौं । नेपालमा प्रतिबन्धित अनलाइन जुवा वान एक्स बेटलाई प्रवर्द्धन गरेको आरोपमा पक्राउ परेका ८ जना कलाकार तथा युट्युबरमाथि प्रहरीले अनुसन्धान सिध्याएको छ । काठमाडौं प्रहरी परिसरले आज अनुसन्धान प्रतिवेदन सरकारी वकिल कार्यालयलाई बुझाएको हो ।

पक्राउ परेका उनीहरुविरुद्ध एक वर्षसम्म कैद र १० हजार रुपैयाँसम्म जरिवाना सजायको माग गर्न सरकारी वकिललाई राय दिइएको काठमाडौं प्रहरी स्रोतले जनाएको छ । सरकारी वकिलले अनुसन्धान प्रतिवेदन अध्ययन गरेर अभियोग पत्र दर्ता गर्नेछन् ।

मुलुकी फौजदारी अपराध संहिता २०७४ को दफा १२५ को उपदफा ४,५ र ६ बमोजिम सजाय मागदावी गर्न राय दिइएको हो । युट्युबर तथा कलाकारले वान एक्स बेटको प्रोमो कोड प्रयोग गरेर सट्टेबाजीलाई प्रवर्द्धन गरेको प्रहरीको दाबी छ । प्रोमो कोड प्रयोग गरेबापत उनिहरुले सट्टेबाजी गर्ने कम्पनीबाट पैसासमेत प्राप्त गरेको दाबी गरिएको छ ।

गत जेठ ३२ गते मरिचमान श्रेष्ठ (बल्छी ध्रुब्रे) राजु पौडेल (राजुमास्टर), पवन खतिवडा (म्याकुरी), बेगम नेपाली (भटभटे माइला) युट्युबर अलिश राई, युट्युबर जलन घर्तीमगर (जलन), गणेश देवकोटा (जिडी) र सरोज घिमिरे (ढेडो बुढो)लाई काठमाडौं उपत्यका अपराध अनुसन्धान कार्यालयको टोलीले पक्राउ गरेको थियो ।