विद्युत प्राधिकरणका इन्जिनियर यादवविरुद्ध विशेष अदालतमा मुद्दा

काठमाडौं। नेपाल विद्युत प्राधिकरणका तत्कालीन मेकानिकल इन्जिनियर कृष्णप्रसाद यादवविरुद्ध विशेष अदालतमा भ्रटाचार मुद्दा परेको छ । यादवले जागिरे अवधिमा कमाएको आम्दानी भन्दा दोब्बर सम्पत्ति जोडेको आरोपमा अख्तियार दुरुपयोग अनुसन्धान अयोगले आज अदालतमा मुद्दा दायर गरेको हो ।

२०४८ पुस ९ गते जागिर खाएका यादव २०७९ जेठ ९ मा अवकास पाएका थिए । उनले यो अवधिमा एक करोड ७१ लाख ४६ हजार ४४ रुपैँया ४९ पैसा आय आर्जन गरेको देखिन्छ । तर, उनले घर, निर्माण, जग्गा खरिद र रजिष्ट्रेसन दस्तुर, अध्ययन खर्च तथा छोराछोरीलाई विदेश पठाउँदाको खर्च, शेयर खरिद तथा लगानी र बैंक मौज्जादसमेत गसिर तीन करोड १३ लाख ९८ हजार ५ सय ९४ रुपैँया ९० पैसा खर्च तथा लगानी गरेको देखिन्छ ।

अख्तियारका अनुसार यादवको सिर्जित सम्पत्ति एवं खर्च तथा लगानी गरेको कूल खर्च र सोही अवधिको आय व्ययविवरण अनुसार स्रोत खुल्न आएको वैध सम्पत्तिको अनुपातमा एक करोड ४२ लाख ५२ हजार ५ सय ५० रुपैँया ४१ पैसाको स्रोत खुल्दैन । अख्तियारले एक करोड ४२ लाख ५२ हजार ५ सय ५० रुपैँया ४१ पैसाको बिगो जरिवाना र कैद सँजायको मागदावी गरेको छ ।