भ्रष्टाचारीलाई प्रदर्शनकारीको प्रश्न– करोडौं पर्ने बंगला तिमीलाई कसले किन्दियो ?

काठमाडौं। नागरिक अगुवाहरुले कारबाहीको माग गर्दै भ्रष्टाचारविरुद्ध प्रदर्शन गरेका छन् ।

आज काठमाडौंको माईतीघर मण्डलामा भ्रष्टाचारीहरुलाई तत्काल कानूनी दायरामा ल्याइ कडा कारबाही गर्न माग र्गै विरोध प्रदर्शन गरेका हुन् । नागरिक अगुवासहितको टोलीले माईतीघरमा जम्मा भइ भ्रष्टाचारबिरोधी विभिन्न सांगीतिक प्रश्तुतिसमेत दिएका थिए ।

उक्त विरोध प्रदर्शनमा बोल्दै राष्ट्रिय स्वतन्त्र पार्टीका सांसद आसिम शाहले आफूले यस प्रकरणबारे संसदमा पनि आवाज उठाएको र अहिले नागरिकस्तरबाट आवाज आइरहेकाले सशक्त रुपमा सदन र सडकमा उभिएको बताए । उनले राजनीतिको परिभाषा नै पैसा कमाउने हो भन्ने प्रवृत्ति देखिएकाले यस्तो प्रवृत्ति चिर्न आवश्यक रहेको पनि बताए।

प्रदर्शनमा सहभागी काजीबहादुर घिमिरेले यो सरकारको विश्वास नै नभएको र विश्वास नभएकै कारण युवा नेताहरु जन्मिरहेको पुष्टि गरे । उनले क्षणिक समयको स्वार्थमा अहिलेका नेताहरुले काम गरिरहेको बताए । साथै उनले देश अफ्ठ्यारोमा पर्दा विदेश भाग जाने पक्षमा रहेको पनि भने । उनले अहिलेको नेताहरु भगौडे रहेको र सबै उद्योग धन्दाहरु बेचेर खाइसकेकाले भ्रष्टाचारीलाई छोड्नु नहुने दाबी गरे।

प्रदर्शनकारीहरुले जनता मूर्ख छन् भनेर अहिले पनि नेताहरुले ठगीरहेको बताए ।