टोपबहादुर रायमाझीका छोरा सन्दीपलाई काठमाडौं ल्याइयो

काठमाडौं । नक्कली भुटानी शरणार्थी बनाएर अमेरिका पठाउने प्रकरणमा संलग्न रहेको आरोपमा बुटवलबाट पक्राउ परेका नेकपा (एमाले) का नेता टोपबहादुर रायमाझीका छोरा सन्दीपलाई काठमाडौं ल्याइएको छ । काठमाडौंका एसएसपी दानबहादुर कार्कीका अनुसार उनलाई अहिले बिहान काठमाडौं ल्याइएको हो ।

उनी नेपाली युवालाई नक्कली भुटानी शरणार्थी बनाएर अमेरिका लैजान ८७५ युवासँग रकम उठाउने गिरोहका सदस्य भएको आरोप छ । प्रहरीले उक्त प्रकरणबारे थप अनुसन्धानका लागि म्याद थप गर्न जिल्ला अदालत काठमाडौंमा अदालतमा पेस गर्ने तयारी छ । सोही आरोपमा प्रहरीले पूर्वमन्त्री टोपबहादुर रायमाझीलाई समेत आज बिहान भैरहवामै पक्राउ गरिसकेको छ । उनलाई पनि आजै काठमाडौँ ल्याउने प्रहरीको तयारी छ ।