सभामुखले ओली निवासमा बोलाएको बैठकमा प्रचण्ड र देउवा गएनन्, बैठक स्थगित

काठमाडौं। सभामुख देवराज घिमिरेले बोलाएको शीर्ष नेताको बैठक स्थगित भएको छ । घिमिरेले एमालेका अध्यक्ष केपी शर्मा ओलीको निवासमा शीर्ष नेताको बैठक डाकेका थिए।

आज बिहान ९ बजेका लागि बोलाइएको उक्त बैठक प्रधानमन्त्री पुष्पकमल दाहाल प्रचण्ड र नेपाली कांग्रेसका सभापति शेरबहादुर देउवा अनुपस्थित भएपछि स्थगित भएको हो ।

बैठकका लागि एमाले सचेतक महेश बर्तौला र पूर्वमहान्यायाधिवक्ता रमेश बडाल भने बालकोट पुगेका थिए । प्रधानमन्त्रीले बैठक नबस्ने जानकारी ९ः१५ तिरमात्रै गराएको बर्तौलाले जानकारी दिए ।

संसद्मा विचाराधीन महत्वपूर्ण विधेयक, संयुक्त समिति निर्माणलगायत विषयमा शीर्ष नेताहरूबीच छलफल भएर अगाडि बढ्नुपर्नेमा सत्तापक्ष नै गम्भीर नभएको बर्तौलाको आरोप छ ।

गएको शुक्रबार बोलाइएको बैठक पनि स्थगित भएको थियो । सभामुखका प्रेस सल्लाहकार शेखर अधिकारीका अनुसार प्रचण्ड र देउवाले दुई दिनपछि बस्ने गरी स्थगित गर्न आग्रह गरेका थिए ।