संचार सचिव अर्याललाई जगेडामा किन लगियो ?

काठमाडौं । प्रधानमन्त्री तथा मन्त्रिपरिषदको कार्यालयमा अतिरिक्त समूहमा सचिव सरुवा गर्ने परिपाटी नै बस्न थालेको छ । विगतमा यदाकदा सचिवहरुलाई अतिरिक्त समूहमा राखिए पनि पछिल्ला दिनमा विशिष्ट श्रेणीका कर्मचारीलाई विनाजिम्मेवारी अतिरिक्त समूहमा राखिएको छ ।

अतिरिक्त समूहमा लामो समय बसेर तथ्यांक विभागमा नयाँ सचिवको दरबन्दी सृजना गरी रामप्रसाद थपलियाको ब्यवस्थापन गरिएको महिना दिन नबित्दै उनको स्थान बैकुन्ठ अर्यालले लिन पुगेका छन् । असारको पहिलो साता अवकाश हुन लागेका सचिव अर्याललाई प्रधानमन्त्री तथा मन्त्रिपरिषद कार्यालयमा अतिरिक्त समूहमा राखिएको छ । बरिष्ठ सचिव अर्याललाई निजामती सेवा ऐन बिपरीत अतिरिक्त समूहमा राखिएको भन्दै धेरैले सहानभूति प्रकट गरेका छन् । तर भित्री रहस्य भने अर्कै रहेको स्रोतको दाबी छ । स्रोतका अनुसार हालका मुख्यसचिव शंकरदास बैरागीको कार्यशैलीप्रति प्रचण्ड नेतृत्वको सरकार सन्तुष्ट छैन ।

तत्कालीन केपी शर्मा ओली नेतृत्वको सरकारका पालामा मुख्यसचिव बन्न सफल भएका बैरागीलाई एमाले निकटको संज्ञा दिने गरिन्छ । उनले मन्त्रिपरिषदले गर्न लागेका महत्वपूर्ण सूचना बालकोटमा चुहाउने गरेको आरोप छ । सोही आरोपका कारण प्रचण्डले बैरागीलाई मागेकै देशको राजदूत बनाएर मुख्यसचिवबाट बिदाइ गर्ने र सो स्थानमा अर्याललाई मुख्यसचिव बनाउने खेल भइरहेको छ । सोही योजनालाई मूर्तरुप दिन अर्याललाई प्रधानमन्त्री तथा मन्त्रिपरिषद कार्यालयमा लगिएको स्रोतको दाबी छ ।

परराष्ट्र समूहबाट आएका बैरागी संकीर्ण स्वभावका भनेर चिनिन्छन् । केही क्षेत्रीय र जातीय आधारमा कर्मचारीहरुसँग निकट सम्बन्ध राख्ने र अरु कर्मचारीलाई पाखा लाउने कार्यमा महत्वपूर्ण भूमिका खेल्दैआएका बैरागीलाई पछिल्लो समय निजामती प्रशासनलाई झनै पंगु बनाउन महत्वपूर्ण भूमिका खेलेको आरोप छ । प्रधानमन्त्री तथा मन्त्रिपरिषदका सदस्यले कर्मचारीहरुको तेजोबध गर्ने निर्णय लिंदा कर्मचारीको मुख्य अभिभावक भएर पनि उनीहरुको पक्षमा कुनै किसिमको भूमिका नखेली आफ्नो मात्र पद सुरक्षित गर्न भुमिका खेलेको आरोप छ ।