अर्थसचिव राय भन्छन्– कठोर निर्णय नगरे भयावह अवस्था आउन सक्छ

काठमाडौ ं। अर्थमन्त्रालयका सचिव तोयम रायले अर्थतन्त्र संकटग्रस्त भएकोतर्फ संकेत गर्दैै थप कठोर निर्णय नगरे अवस्था झनै भयावह हुनसक्ने बताएका छन् ।

आइतबार नवनियुक्त अर्थमन्त्री डा. प्रकाशशरण महतलाई  स्वागत गर्दै उनले कठोर निर्णय नगर्ने हो भने स्थिति गम्भीर बन्न सक्ने बताएका हुन् । सचिव रायले भने–स्थिति सामान्य छैन । भयावह अवस्था आउन सक्छ ।

राजस्व लक्ष्यअनुरुप असुली हुन नसकेको अवस्था छ । तलव समेत खुवाउन नसक्ने अवस्थालाई दृष्टिगत गरी अर्थसचिव रायले चालु खर्चमा कडाइका साथ कटौती गर्न थालेका छन् । अनावश्यक खर्चमा कटौती गर्दै लगिएको छ । जसका कारण सांसदहरुसँग अर्थमन्त्रालयका सचिव रायको विवाद हुँदैआएको छ । राजस्व असुलीमा बृद्धि गर्नेतर्फ अहोरात्र लागिरहेका सचिवले बजेट कटौती गरेको भन्दै सांसद र नेताहरु दिनहुँ मन्त्रालयमा विवाद गर्न जाने गरेका छन् ।

अर्थतन्त्रमा आएको मन्दीले सरकारी खाताको अवस्था नाजुक छ । पचास वर्षयताकै राजस्वमा गम्भीर समस्या देखिइरहेको छ । नवनियुक्त अर्थमन्त्री डा. महतले पनि संकटको घडीमा सबै पक्षले दिनरात नभनी हातेमालो गरी काम गर्नुपने बताइसकेका छन् । स्वागत कार्यक्रममा मन्त्रीको निर्देशन अनुसार नै काम गर्न तयार रहेको सचिव रायले बताए ।

सचिव रायले कर्मचारी कुनै पार्टी विशेषको नहुने र राष्ट्रको निम्ति जुनसुकै भूमिकामा रहेर काम गर्नसक्ने बताएका छन् ।