दलहरुबीच भागबण्डा मिलेन, मन्त्रिपरिषद बिस्तार कहिले हुने ?

काठमाडौँ । सत्ता गठबन्धन दलहरुबीच भागबण्डा नमिल्दा प्रधानमन्त्री पष्ुपकमल दाहाल ‘प्रचण्ड’ले विश्वासको मत लिएको एक साता बितिसक्दा पनि मन्त्रिपरिषदले पूर्णता पाउन सकेको छैन । प्रधानमन्त्री प्रचण्डले चैत ६ मा विश्वासको मत लिएका थिए ।

सरकारको मुख्य घटक नेपाली कांग्रेसले ८ वटा मन्त्रालयको अडान छाडेको छैन । नेकपा एकीकृत समाजवादीले गृह, भौतिक पूर्वाधार वा अर्थसहित ३ मन्त्रालय नपाए सरकारमा सहभागी नहुने अड्डी लिइरहेको छ ।

राष्ट्रपति पद नै त्यागेर यो गठबन्धनमा आएकाले नेकपा एसले ३ वटा मन्त्रालयमा अडान राखेको हो । जसपाले ३ मन्त्रालय मागिरहेको छ । उसलाई उपराष्ट्रपति दिएकाले २ मा मनाउने प्रयास भइरहेको छ ।

लोसपा २, नागरिक उन्मुक्ति २, जनमत पार्टी २, प्रभु साह र अमरेश सिंह मिलेर १ मन्त्रालय माग गर्दा भागबण्डा पुर्याउन मुस्किल पर्दैआएको छ । मन्त्रालय २२ वटा छन् । तर २५ भन्दा बढी मन्त्री बनाए पनि भागण्बडा पुर्याउन नसक्ने अवस्था छ । जसका कारण प्रधानमन्त्री प्रचण्डले मन्त्रिपरिषदलाई पूर्णता दिन सकिरहेका छैनन् ।

मन्त्रालयको संख्या नै २५ पुर्याउन पनि आर्थिक संकटको अवस्थामा खर्च बढ्ने भएकाले संभावना छैन । कतिपय पार्टीलाई राज्यमन्त्री बनाएर भए पनि मंगलबारसम्म मन्त्रिपरिषदलाई पूर्णता दिने तयारीमा प्रधानमन्त्री प्रचण्ड छन् ।