सुजाताका पीए पक्राउः नेपालीलाई भूटानी शरणार्थी बनाउने धन्दामा को को छन् ?

काठमाडौं । नेपालीलाई भूटानी शरणार्थी बनाउँदै यूरोपदेखि अमेरिकासम्म पठाउने गिरोहका मुख्य नाइके पूर्व परराष्ट्र मन्त्री तथा नेपाली नेपाली कांग्रेसकी नेतृ सुजाता कोइरालाका निजी सचिव केशवप्रसाद दुलाल पक्राउ परेका छन् । उपत्यका अपराध अनुसन्धान कार्यालयले आइतबार दुलाललाई पक्राउ गरेपछि उनको गिरोहमा को को छन्, तिनको पनि प्रहरीले खोजी गर्ला कि राजनीतिक दबाबमा दुलाललाई उन्मुक्ति देला भन्ने शंका उपशंका प्रकट हुन थालेका छन् ।

कीर्ते कागजात तयार गरी नेपालीलाई भूटानी शरणार्थी बनाउने समूहको मुख्य नाइके आवरणमा दुलाल देखिएका छन् । तर उनको यस्तो गैरकानुनी धन्दामा गृहमन्त्रालय अन्तर्गत प्रशासन कार्यालयका कर्मचारीदेखि परराष्ट्र मन्त्रालयका अधिकारीसम्मको संलग्नता विना भूटानी शरणार्थीलाई नेपाली बनाउन संभव नै नभएको प्रहरीका अधिकारी बताउँछन् ।

दुलालले पूर्व परराष्ट्र मन्त्री सुजाता कोइरालाको आडभरोसामा नेपालीलाई भूटानी शरणार्थी बनाएर पठाउने ४ बर्षदेखि तत्कालीन गृहमन्त्री रामबहादुर थापा ‘बादल’का पालादेखि गर्दैआएको स्र्रोत बताउँछ ।

नेपालीलाई भूटानी शरणार्थी बनाउने र अमेरिका पठाउनेसम्मको दुलाल गिरोहले प्रतिब्यक्ति २० देखि ३० लाख रुपैयाँसम्म उठाएको र प्रहरीले गहन अनुसन्धान गरेमा यसमा करोड होइन, अरब नै संकलन गरिएको हुनसक्ने स्रोत बताउँछ । प्रहरीले प्रारम्भिक अनुसन्धानमा ८१ जना नेपालीलाई दुलाल समूहले भूटानी शरणार्थी बनाएर विदेश पठाएको फेलापारेको छ । स्रोतका अनुसार राजनीतिक दबाब चिरेर यसको बिस्तृत अनुसन्धान प्रहरीले गर्न सकेमा अरब नै उठाएको फेलापर्नेछ ।