काठमाडौं । आफ्ना सम्धीलाई राष्ट्रिय वाणिज्य बैंक सञ्चालक समितिको अध्यक्ष बनाउन शक्तिको दुरुपयोग गरेको आरोप उपप्रधान तथा रक्षामन्त्री ईश्वर पोखरेलले अस्वीकार गरेका छन् । उनले आज एक विज्ञप्ति जारी गर्दै आफ्नो नाता वा सम्बन्धमा रहेका व्यक्तिले पद वा सम्बन्धको दुरुपयोग नगरेको ठोकुवा गरेका हुन्।
पछिल्लो समय लाभको पदमा रजाइँ गर्दै आएका पोखरेलका सम्धी उपेन्द्र कोइरालाको अहिले सम्भावित नियुक्तिको विषय भने चर्चित बनेको छ ।
कोइरालालाई सञ्चालयक समितिको अध्यक्ष बनाउन सरकारले यसअघिका अध्यक्ष निर्मलहरि अधिकारीलाई राजस्व बोर्डको सदस्य बनाएको घटना बाहिरिएसँगै पोखरेलको चौतर्फी आलोचना भैरहेको छ ।
आलोचना बढ्दै गएपछि राष्ट्रिय वाणिज्य बैंकको सञ्चालक समितिको आजको बैठक समेत स्थगित भएको छ । आजको बैठकको एजेण्डा नै कोइरालालाई अध्यक्ष बनाउने थियो । उनको नियुक्तिका बारेमा भैरहेको विरोधकाबीच अहिले यो विषयलाई अघि बढाउन उपयुक्त नहुने भन्दै बैठक स्थगित भएको बताइएको छ ।
‘केही दिनयता मलाई केन्द्रीत गरी कतिपय संचार माध्यमले समाचार सम्प्रेषण गरेका छन्। ती समाचारप्रति मेरो गम्भीर ध्यानाकर्षण भएको छ’, मन्त्री पोखरेलले विज्ञप्तिमा भनेका छन्, ‘मेरो परिवारका कुनै सदस्य वा मेरा कुनै नाता सम्बन्धमा रहेका व्यक्तिहरूद्वारा पद वा मसितको सम्बन्धको दुरूपयोग गरी विद्यमान क़ानूनी व्यवस्थालाई उल्लंघन गरेर लाभ लिएको वा पद प्राप्त गरेको भन्ने विषयमा कुनै सत्यता छैन।’
यस्तो छ पोखरेलको विज्ञप्तिको पूर्णपाठ :-
सबै महानुभावहरूमा अनुरोध !
केही दिनयता मलाई केन्द्रीत गरी कतिपय संचार माध्यमहरूले समाचार सम्प्रेषण गरेका छन् । ती समाचारहरूप्रति मेरो गंभीर ध्यानाकर्षण भएको छ ।
मेरो परिवारका कुनै सदस्य वा मेरा कुनै नाता सम्बन्धमा रहेका व्यक्तिहरूद्वारा पद वा मसितको सम्बन्धको दुरूपयोग गरी विद्यमान क़ानूनी व्यवस्थालाई उल्लंघन गरेर लाभ लिएकाे वा पद प्राप्त गरेको भन्ने विषयमा कुनै सत्यता छैन ।
भएका काम विधिसम्मत, पारदर्शितासहित र संस्थागत निर्णय प्रक्रियाका आधारमा मात्रै भएका छन् । कहींकतै पनि मेराे अबाञ्छित चासो वा हस्तक्षेप नभएको कुरा जानकारी गराउँदछु । यदि अन्यथा भएको पाइएमा वा प्रमाणित भएमा सार्वजनिक रूपमा सजायको भागिदार हुने समेत विश्वास दिलाउन चाहन्छु ।
मेरो यो दृढता र विश्वासलाई लाञ्छित गर्ने हिसाबले तथ्यहीन र अत्यन्त गलत मनसायका साथ सार्वजनिक भएका/ गरिएका कुराहरूप्रति खेद व्यक्त गर्दछु । यस्ताे विषयका कारण दु:खित हुनुभएका मप्रति सद्भाव राख्ने, मलाई माया गर्ने, समर्थन गर्नुहुने आदरणीय मित्रहरूलाई कुनै पनि किसिमको भ्रममा नपर्न अनुरोध गर्दछु ।
विगतमा राजाले सम्पूर्ण शासन सत्ता आफ्नो हातमा लिएको र त्यसविरूद्ध संघर्ष गरेका कारण यातनापूर्ण बन्दी जीवन विताइरहेका बेला सम्पूर्ण रूपमा बदनाम र चरित्रहत्या गर्ने हिसावले “घरको पानी ट्यांकीमा पैसा राखेको“ कुप्रचार गरिएको थियो ।
अहिले विगतको निरंकुश शाही शासनका तिनै दुष्ट मतियारहरू समेत नयाँ ढंगले मेराे बिरूद्धमा स्वर उरालिरहेका छन् ! म ती सबैलाई चुनौती दिदै घृणापूर्वक अस्वीकार गर्दछु । सम्पूर्ण शुभचिन्तक, समर्थक, मित्रहरू तथा आम जनतालाई विश्वास दिलाउन चाहन्छु – तपाईंहरूको विश्वास र भरोसालाई म कहिल्यै / कहिल्यै कमजोर हुन दिने छैन – किमार्थ टुट्न दिने छैन !!
– ईश्वर पोखरेल
१० भदाै २०७७
