काठमाडौं । संयुक्त राष्ट्रसंघीय शान्ति मिसनबाट फर्किएका ३ सय ७६ सैनिक अधिकारीलाई क्वारेन्टिनमा राखिएको छ । सम्भावित कोरोना संक्रमणको जोखिमलाई ध्यानमा राखेका ती सैनिकलाई उपत्यकाका विभिन्न ९ स्थानका क्वारेन्टिनमा राखिएको छ।
गत भदौ ५ गते दक्षिणी सुडानबाट दोस्रो रोटेसन फ्लाइटमा १ सय ५० जनाको फौज नेपाल फर्किएको छ। साउनयता दक्षिणी सुडान, कार, माली र इराकबाट ६ सय ७७ जना शान्ति सेना फर्किएका छन्। तीमध्ये ३ सय १ जना घर फर्किएका छन्। साउन २ गते कारबाट ६० जना र मालीबाट ९८ जना फर्किएका थिए। इराकबाट साउन २१ मा ३५ सैनिक स्वदेश फर्किएका छन्।
साउन १४ र भदौ ५ गते दक्षिण सुडानबाट दुई लटमा ४ सय ८४ शान्ति सेना फर्किएका हुन्।
साउन १४ गते दक्षिणी सुडानबाट फर्किएकामध्ये दुई सैनिक अधिकारीमा कोरोना संक्रमण देखिएपछि लगत्तै कन्ट्याक्ट ट्रेसिङ गरिएको थियो। संक्रमित दुई र कन्ट्याक्ट ट्रेसिङ मा परेका ६ गरी आठ सैनिक अधिकारी निको भएर घर फर्किएका जंगी अड्डा स्रोतले जनाएको छ।
