बेपत्ता व्यक्तिको छानबिनसम्बन्धी विधेयक संसदमा पेस हुँदै

काठमाडौं । प्रतिनिधिसभा बैठकमा बेपत्ता पारिएका व्यक्तिको छानबिन, सत्यनिरुपण तथा मेलमिलाप आयोग (तेस्रो संशोधन) विधेयक २०७९ पेस हुने भएको छ । आज दिउँसो १ बजे बस्ने प्रतिनिधिसभाको बैठकमा प्रधानमन्त्री पुष्पकमल दाहाल प्रचण्डले सो विधेयक पेस गर्न लागेका हुन् ।

शनिबार बसेको सत्ता साझेदार १० दलको बैठकले सो विधेयक आइतबारको संसद बैठकमा पेस गर्ने निर्णय गरेको थियो ।

यस्तै, प्रधानमन्त्री प्रचण्डले संवैधानिक परिषद् सम्बन्धी (पहिलो संशोधन) विधेयक, २०७९ पेस गर्ने सम्भावित कार्यसूची रहेको संसद सचिवालयले जनाएको छ । बैठकमा सभामुख देवराज घिमिरेले राष्ट्रपतिको कार्यालयबाट प्राप्त कार्यभार तोकिएको सम्बन्धी पत्रहरूको ब्यहोरा जानकारी गराउने कार्यसूची रहेको छ ।