जिप दुर्घटना हुँदा एक जनाको मृत्यु, नौं घाइते

काठमाडौं । दार्चुलामा जिप दुर्घटना भएको छ । जिप दुर्घटनामा परेर एक जनाको मृत्यु भएको हो ।

दुर्घटनामा घाइते भएकी ६० वर्षीया कालीदेवी नेगीको जिल्ला अस्पताल दार्चुलामा उपचारका क्रममा मृत्यु भएको प्रहरीले जनाएको छ ।

आज बिहान मधेस प्रदेश ०३–००–०३४० नम्बरको जिप महाकाली नगरपालिका–४ बाङ्गाबगर खानेपानी ट्याङ्की नजिक लास्कु खोलामा खसेको थियो । उनीहरू डुङरी मन्दिरमा पूजापाठ गर्न आएको बुझिएको छ ।

जिप दुर्घटनामा जिप चालक मोहनसिंह लोथ्याल, भारतीय नागरिक विमलादेवी नेगी, मख्खनराम नेगी, किरणकुमारी आग्री, शान्तिदेवी नेगी, दिवान आग्री, जोतविरसिंह कुवँर, अन्जुदेवी कुवँर र गुरुजोत सरदार घाइते भएका छन् ।

दुर्घटनामा घाइते भएका अन्य तीन जनालाई उपचारका लागि भारतको पिथौरागढ रेफर गरिएको दार्चुलाका प्रहरी नायब उपरीक्षक (डीएसपी) तर्कराज पाण्डेयले बताए । अन्य घाइतेहरुको जिल्ला अस्पताल दार्चुलामा उपचार भइरहेको छ ।