मलेसियामाथि नेपालको सानदार जित

काठमाडौं। आईसीसी यू–१९ विश्वकप एसिया क्षेत्र छनोटको चौथो खेलमा नेपालले मलेसियामाथि १० विकेटको सानदार जित हात पारेको छ । यूएईस्थित मलेक क्रिकेट मैदानमा सम्पन्न खेलमा नेपालले मलेसियालाई १० विकेटले हराएको हो। मलेसियाले दिएको ७३ रनको झिनो लक्ष्य नेपालले बिना क्षति पावर प्ले पनि नसकिँदै पूरा गरेको हो ।

टस जितेर ब्याटिङमा उत्रिएको मलेसियाले ३५.३ ओभरमा सबै विकेट गुमाउँदै ७२ रन बनाएको थियो। जवाफी ब्याटिङमा उत्रिएको नेपालले बिना कुनै विकेटको क्षति १० औं ओभरमै लक्ष्य भेट्टाएको हो।

सुरुवाती ब्याटिङमा उत्रिएको मलेसियाका लागि मोहम्मद अक्रमले सर्वाधिक २६ रन बनाउँदा मोहम्मद हैरिल र मोहम्मद स्यामेलले समान १२ रन बनाए। त्यसबाहेकका ब्याट्सम्यानले दोहोरो अंकको रन छुन सकेनन्। बलिङतर्फ नेपालका दीपेश कणेलले सर्वाधिक ४ विकेट लिँदा आकाश चन्दले ३, मिलन बोहोराले २ तथा सुवास भण्डारीले १ विकेट लिए।

जवाफी ब्याटिङमा उत्रिएको नेपालले दीपक बोहोराको अविजित ३८ र अर्जुन कुमालले अविजित २१ रन बनाए।

जितसँगै नेपाल लगातार ४ खेलमा जित निकाल्दै ८ अंक जोडेर तालिकाको शीर्षस्थानमा उक्लिएको छ। दोस्रो स्थानमा रहेको यूएईले ३ खेलबाट ६ अंक जोडेको छ। यूएई कुवेतसँग प्रतिस्पर्धा गरिरहेको छ। मलेसिया भने ४ खेलबाट २ अंक जोडेर तालिकाको तेस्रो स्थानमा छ।

नेपालले पहिलो खेलमा सिंगापुरलाई र दोस्रो खेलमा कुवेतलाई हराएको थियो। नेपालले सिंगापुरमाथि ९६ र कुवेतमाथि २४३ रनको फराकिलो जित निकालेको थियो।